bhO shambhO

భో శంభో 

రేవతి రాగం - ఆది తాళం
స్వామి దయానంద సరస్వతి రచన

- శ్రీగణేశాయ నమ: -
కృపాసముద్రం, సుముఖం, త్రినేత్రం
జటాధరం, పార్వతి వామభాగం,
సదాశివం, రుద్రం, అఖండ రూపం,
చిదంబరేశం హృది, వెళ్ళియం గిరీశం హృది,
భావయామి - 6

ప. భో శంభో శివ శంభో స్వయంభో

అ.ప. గంగాధర శంకర కరుణాకర
మామవ భవసాగర తారక |4|

|| భో శంభో శివ శంభో స్వయంభో ||

చ.1. నిర్గుణ పరబ్రహ్మ స్వరూప - 2
గమగమ భూత ప్రపంచ రహిత |2|
నిజపుర నిహిత నితాంత అనంత - 3
ఆనంద అతిశయ అక్షయలింగ |2| - 2

|| భో శంభో శివ శంభో స్వయంభో -2 ||

చ.2. ధిమిత ధిమిత ధిమి ధిమికిట తకతోం - 2
తోం తోం తిమికిట తరికిట కిటతోం - 2 |2|
మతంగ మునివర వందిత ఈశ - 3
శర్వ దిగంబర వేష్టితవేష |2|
నిత్య నిరంజన నిత్యనటేశ - 2
ఈశ సభేశ సర్వేశ

|| భో శంభో శివ శంభో స్వయంభో ||

|మతంగ ...|
మతంగ మునివర వందిత ఈశ
శర్వ దిగంబర వేష్టితవేష - 2
నిత్య నిరంజన నిత్యనటేశ - 2
ఈశ సభేశ సర్వేశ

శివ శంభో స్వయంభో
శివ శంభో స్వయంభో 
శివ శంభో స్వయంభో
శివ శంభో స్వయంభో



-------------------------------------------------------------------
bhO SambhO
rEvati rAgaM - Adi tALaM
swAmi dayAnanda saraswati rachana

tadarI...
kRpAsamudraM, sumukhaM, trinEtraM
jaTAdharaM, pArvati vAmabhAgaM,
sadASivaM, rudraM, akhanDa rUpam,
chidambarESam, hRdi veLLiyam girISam hRdi
bhAvayAmi - 6


pa. BhO SambhO Siva SambhO swayambhO

a.pa. gangAdhara Sankara karuNaakara
maamava bhava sAgara tAraka |4|

|| bhO SambhO Siva SambhO swayambhO ||

ca.1. nirguNa parabrahma swarUpa - 2
gamagama bhUta prapancha rahita |2|
nijapura nihita nitAnta ananta - 3
Ananda atiSaya akshayalinga |2|

|| bhO SambhO Siva SambhO swayambhO -2 ||

ca.2. dhimita dhimita dhimi dhimikiTa takatOm - 2
tOm tOm timikiTa tarikiTa kiTatOm - 2 |2|
matanga munivara vandita ISa - 3
sarva digambara vEshTita vEsha |2|
nitya niranjana nityanaTESa - 2
ISa sabhESa sarvESa

|| bhO SambhO Siva SambhO swayambhO ||

|matanga ...|
matanga munivara vandita ISa
sarva digambara vEshTita vEsha - 2
nitya niranjana nityanaTESa - 2
ISa sabhESa sarvESa

Siva SambhO swayambhO
Siva SambO swayambhO
Siva SambhO swayambhO
Siva SambhO swayambhO

sankaTahara gaNEsha stOtram

శ్రీ సంకటహర గణేష స్తోత్రం
 

- శ్రీగణేశాయ నమ: -

హరి:ఓం శ్రీ నారద ఉవాచ -

ప్రణమ్య శిరసా దేవం గౌరీ పుత్రం వినాయకం
భక్తవాసం స్మరేన్నిత్యం ఆయు: కామార్థ సిద్ధయే ||1||

ప్రథమం వక్రతుండం చ ఏకదంతం ద్వితీయకం
తృతీయం కృష్ణ పింగాక్షం గజవక్త్రం చతుర్థకం ||2||

లంబోదరం పంచమం చ షష్టం వికటమేవ చ
సప్తమం విఘ్నరాజం చ ధూమ్రవర్ణం తధాష్టకం ||3||

నవమం ఫాలచంద్రం చ దశమంతు వినాయకం
ఏకాదశం గణపతిం ద్వాదశంతు గజాననం ||4||

ద్వాదశైతాని నామాని త్రిసంధ్యం య: పఠేన్నర:
నచవిఘ్న భయంతస్య సర్వసిద్ధి కరంప్రభో ||5||

విద్యార్థి లభతేవిద్య ధనార్ధి లభతేధనం
పుత్రార్థి లభతేపుత్రాన్ మోక్షార్ధి లభతేగతిం ||6||

జపేత్ గణపతిస్తోత్రం షడ్భిర్మాసై: ఫలంలభేత్
సంవత్సరేణ సిద్ధీం చ లభతే నాత్ర సంశయ: ||7||

అష్టభ్యో బ్రాహ్మణేభ్యశ్చ లిఖిత్వాం య:సమర్పయేత్
తస్య విద్య భవేత్సర్వా గణేశస్య ప్రసాదత: ||8||

ఇతి శ్రీ నారదపురాణే సంకటనాశన గణపతిస్తోత్రం సంపూర్ణం ||

gOvindAStakam

గోవిందాష్టకం

- శ్రీగణేశాయ నమ: -

సత్యం జ్ఞానమనంతం నిత్యమనాకాశం పరమాకాశం
 గోష్ఠప్రాఙ్గణరిఙ్గణలోలమనాయాసం పరమాయాసం |
మాయాకల్పితనానాకారమనాకారం భువనాకారం
 క్ష్మామా(క్ష్మాయా) నాథమనాథం ప్రణమత గోవిందం పరమానందం ||1||

మృత్స్నామత్సీహేతి యశోదాతాడనశైశవ సంత్రాసం
 వ్యాదితవక్త్రాలోకితలోకాలోకచతుర్దశలోకాలం (లిం) |
లోకత్రయపురమూలస్తంభం లోకాలోకమనాలోకం
 లోకేశం పరమేశం ప్రణమత గోవిందం పరమానందం ||2||

త్రైవిష్టపరిపువీరఘ్నం క్షితిభారఘ్నం భవరోగఘ్నం
 కైవల్యం నవనీతాహారమనాహారం భువనాహారం |
వైమల్యస్ఫుటచేతోవృత్తివిశేషాభాసమనాభాసం
 శైవం కేవలశాంతం ప్రణమత గోవిందం పరమానందం ||3||

గోపాలం (ప్ర)భులీలావిగ్రహగోపాలం కులగోపాలం
 గోపీఖేలనగోవర్ధనధృతిలీలాలాలితగోపాలం |
గోభిర్నిగదిత గోవిందస్ఫుటనామానం బహునామానం
 గోధీగోచర దూరం(పథికం) ప్రణమత గోవిందం పరమానందం ||4||

గోపీమండలగోష్ఠీభేదం భేదావస్థమభేదాభం
 శశ్వధ్గోఖురనిర్ధూతోద్ధత ధూలీధూసరసౌభాగ్యం |

శ్రద్ధాభక్తిగృహీతానందమచింత్యం చింతితసద్భావం
 చింతామణిమహిమానం ప్రణమత గోవిందం పరమానందం ||5||

స్నానవ్యాకులయోషిద్వస్త్రముపాదాయాగముపారూఢం
 వ్యాదిత్సంతీరథ దిగ్వస్త్రా హ్యుపుదాతుముపాకర్షంతం(దాతుముపాకర్షంతం తా:) |
నిర్ధూతద్వయశోకవిమోహం బుద్ధం బుద్ధేరంతస్థం
 సత్తామాత్రశరీరం ప్రణమత గోవిందం పరమానందం ||6||

కాంతం కారణకారణమాదిమనాదిం కాలఘ(మ)నాభాసం
 కాలిందీగతకాలియశిరసి (సు)నృత్యంతం ముహుర్నృత్యంతం|

కాలం కాలకలాతీతం కలితాశేషం కలిదోషఘ్నం
 కాలత్రయగతిహేతుం ప్రణమత గోవిందం పరమానందం ||7||

వృందావనభువి వృందారకగణవృందారాధ్యం(ధిత) వందేఽహం
 కుందాభామలమందస్మేరసుధానందం సుహృదానందం |
వంద్యాశేషమహామునిమానసవంద్యానందపదద్వంద్వం
 వంద్యాశేషగుణాబ్ధిం ప్రణమత గోవిందం పరమానందం ||8|| 

గోవిందాష్టకమేతదధీతే గోవిందార్పితచేతా యో
 గోవిందాచ్యుత మాధవ విష్ణో గోకులనాయక కృష్ణేతి |
గోవిందాఙ్ఘ్రిసరోజధ్యానసుధాజలధౌతసమస్తాఘో
 గోవిందం పరమానందామృతమంతస్థం స తమభ్యేతి ||

ఇతి శ్రీమత్పరమహంసపరివ్రాజకాచార్యస్య
శ్రీగోవిందభగవత్పూజ్యపాదశిష్యస్య
శ్రీమచ్ఛంకరభగవత: కృతౌ
శ్రీగోవిందాష్టకం సంపూర్ణం ||

gaurI daSakam

గౌరీ దశకం

- శ్రీగణేశాయ నమ: -

లీలాలబ్ధస్థాపితలుప్తాఖిలలోకాం
 లోకాతీతైర్యోగిభిరన్తశ్చిరమృగ్యాం |
బాలాదిత్యశ్రేణిసమానద్యుతిపుఞ్జాం
 గౌరీమంబామంబురుహాక్షీమహమీడే ||1||

ప్రత్యాహారధ్యానసమాధిస్థితిభాజాం
 నిత్యం చిత్తే నిర్వృతికాష్ఠాం కలయన్తీం |
సత్యజ్ఞానానందమయీం తాం తనురూపాం
 గౌరీమంబామంబురుహాక్షీమహమీడే ||2||

చంద్రాపీడానందితమన్దస్మితవక్త్రాం
 చంద్రాపీడాలంకృతనీలాలకభారాం |
ఇంద్రోపేంద్రాద్యర్చితపాదాంబుజయుగ్మాం
 గౌరీమంబామంబురుహాక్షీమహమీడే ||3||

ఆదిక్షాన్తామక్షరమూర్త్యా విలసన్తీం
 భూతే భూతే భూతకదంబప్రసవిత్రీం |
శబ్దబ్రహ్మానందమయీం తాం తటిదాభాం
 గౌరీమంబామంబురుహాక్షీమహమీడే ||4||

మూలాధారాదుత్థితవీథ్యా విధిరన్ధ్రం
 సౌరం చాన్ద్రం వ్యాప్య విహారజ్వలితాణ్గీం |
యేయం సూక్ష్మాత్సూక్ష్మతనుస్తాం సుఖరూపాం
  గౌరీమంబామంబురుహాక్షీమహమీడే ||5||

నిత్య: శుద్ధో నిష్కల ఏకో జగదీశ:
 సాక్షీ యస్యా: సర్గవిధౌ సంహరణే చ |
విశ్వత్రాణక్రీడనలోలాం శివపత్నీం
 గౌరీమంబామంబురుహాక్షీమహమీడే ||6||

యస్యా: కుక్షౌ లీనమఖణ్డం జగదణ్డం
 భూయో భూయ: ప్రాదురభూదుత్థితమేవ |
పత్యా సార్ధం తాం రజతాద్రౌ విహరన్తీం
 గౌరీమంబామంబురుహాక్షీమహమీడే ||7||

యస్యామోతం ప్రోతమశేషం మణిమాలా -
 సూత్రే యద్వత్క్కాపి చరం చాప్యచరం చ |
తామధ్యాత్మజ్ఞానపదవ్యా గమనీయాం
 గౌరీమంబామంబురుహాక్షీమహమీడే ||8||

నానాకారై: శక్తికదంబైర్భువనాని
 వ్యాప్య స్వైరం క్రీడతి యేయం స్వయమేకా |
కల్యాణీం తాం కల్పలతామానతిభాజాం
 గౌరీమంబామంబురుహాక్షీమహమీడే ||9||

ఆశాపాశక్లేశవినాశం విదధానాం
 పాదాంభోజధ్యానపరాణాం పురుషాణాం |
ఈశామీశార్ధాణ్గహరాం తామభిరామాం
 గౌరీమంబామంబురుహాక్షీమహమీడే ||10||

ప్రాత:కాలే భావవిశుద్ధ: ప్రణిధానా -
 ద్భక్త్యా నిత్యం జల్పతి గౌరీదశకం య: |
వాచాం సిద్ధిం సంపదమగ్ర్యాం శివభక్తిం
 తస్యావశ్యం పర్వతపుత్రీ విదధాతి ||11||

ఇతి శ్రీమత్పరమహంసపరివ్రాజకాచార్యస్య
శ్రీగోవిందభగవత్పూజ్యపాదశిష్యస్య
శ్రీమచ్ఛంకరభగవత: కృతౌ
గౌరీదశకం సంపూర్ణం ||

SrImajjagadguru SaMkara bhagavatpUjya pAdAchArya stava:

శ్రీ శంకర భగవత్పూజ్య పాదాచార్య స్తవ:

- శ్రీగణేశాయ నమ: -

ఓం శ్రీ గురుభ్యో నమ:

ముదా కరేణ పుస్తకం దధానమీశరూపిణం
తథాఽపరేణ ముద్రికాం నమత్తమోవినాశినీం |
కుసుంభవాససావృతం విభూతిభాసిఫాలకం
నతాఘనాశనే రతం నమామి శఙ్కరం గురుం ||1||

పరాశరాత్మజప్రియం పవిత్రితక్షమాతలం
పురాణసారవేదినం సనందనాదిసేవితం |
ప్రసన్నవక్త్రపంకజం ప్రపన్నలోకరక్షకం
ప్రకాశితాద్వితీయతత్త్వమాశ్రయామి దేశికం ||2||

సుధాంశుశేఖారార్చకం సుధీంద్రసేవ్యపాదుకం
సుతాదిమోహనాశకం సుశాంతిదాంతిదాయకం |
సమస్తవేదపారగం సహస్రసూర్యభాసురం
సమాహితాఖిలేంద్రియం సదా భజామి శఙ్కరం ||3||

యమీంద్రచక్రవర్తిణం యమాదియోగవేదిణం
యథార్థతత్త్వబోధకం యమాంతకాత్మజార్చకం |
యమేవ ముక్తికాంక్షయా సమాశ్రయంతి సజ్జనా:
నమామ్యహం సదా గురుం తమేవ శఙ్కరాభిధం ||4||

స్వబాల్య ఏవ నిర్భరం య ఆత్మనో దయాలుతాం
దరిద్రవిప్రమందిరే సువర్ణవృష్టిమానయన్ |
ప్రదర్శ్య విస్మయాంబుధౌ న్యమజ్జయత్ సమాన్ జనాన్
స ఏవ శఙ్కర: సదా జగద్గురుర్గతిర్మమ ||5||

యదీయపుణ్యజన్మనా ప్రసిద్ధిమాప కాలటీ
యదీయశిష్యతాం వ్రజన్ స తోటకోఽపి పప్రథే |
య ఎవ సర్వదేహిణాం విముక్తిమార్గదర్శకో
నరాకృతిం సదాశివం తమాశ్రయామి సద్గురుం ||6||

సనాతనస్య వర్త్మన: సదైవ పాలనాయ య:
చతుర్దిశాసు సన్మఠాన్ చకార లోకవిశ్రుతాన్ |
విభాణ్డకాత్మజాశ్రమాదిసుస్థలేషు పావనాన్
తమేవ లోకశఙ్కరం నమామి శఙ్కరం గురుం ||7||

యదీయహస్తవారిజాతసుప్రతిష్ఠితా సతీ
ప్రసిద్ధశృఙ్గభూధరే సదా ప్రశాంతిభాసురే |
స్వభక్తపాలనవ్రతా విరాజతే హి శారదా
స శఙ్కర: కృపానిధి: కరోతు మామనేనసం ||8||

ఇమం స్తవం జగద్గురోర్గుణానువర్ణనాత్మకం
సమాదరేణ య: పఠేదనన్యభక్తిసంయుత: |
సమాప్నుయాత్ సమీహితం మనోరథం నరోఽచిరాత్
దయానిధే: స శఙ్కరస్య సద్గురో: ప్రసాదత: ||9||

ఇతి శ్రీభారతీ తీర్థస్వామినౌ విరచిత
శ్రీమజ్జగద్గురు శంకర భగవత్పూజ్య పాదాచార్య స్తవం సంపూర్ణం ||

rAma chandrA mangaLam

రామ చంద్ర మంగళం

రామ చంద్రాయ జనక రాజజా మనోహరాయ
మామకాభీష్టదాయ మహిత మంగళం ||

కోశలేంద్రాయ మందహాస దాసపోషణయ
వాసవాది వినుత సద్వరయ మంగళం ||

చారు కుంకుమోపేత చందనాది చర్చితాయ
హారకా శోభితాయ భూరి మంగళం ||

లలిత రత్న కుండలాయ తులసీ వన మాలికాయ
జలజ సద్రుశ దేహాయ చారు మంగళం ||

దేవకీ సుపుత్రాయ దేవ దేవోత్తమయ
భావజా గురువరాయ భవ్య మంగళం ||

పుండరీకాక్షయ పూర్ణ చంద్ర వదనయ
అందజా వాహనయ అతుల్య మంగలం ||

విమల రూపయ వివిధ వేదాంత వేద్యాయ
సుముఖ చిత్త కామిత శుభగ మంగళం ||

రామదాస మృదుల హృదయ తామరస నివాసాయ
స్వామి భద్ర గిరివరాయ సర్వ మంగళం||

---

rAma chandrAya janaka rAjajA manOharAya
mAmakAbheeshTadAya mahita mangaLam ||
---
Mangalam to Ramachandra, the pretty Lord of daughter of Janaka,
And to him who fulfills all my desires without fail,
Mangalam to the Lord of Kosala, who encourages his devotees with smile,
And who is saluted by Indra and his subjects.
---
kOSalEndrAya mandahAsa dAsapOshaNaya
vAsavAdi vinuta sadwaraya mangaLam ||
---

---
chAru kumkumOpEta chandanAdi charchitAya
hArakA SObhitAya bhoori mangaLam ||
---
Mangalam to him who is like a pretty cloud , who is coated with sandal paste
And he who shines in his bracelet ,
Pretty Mangalam to he who wears pretty gem studded ear studs ,
Who wears a garland of Thulasi,
And the one who has a body like lotus.

---
lalita ratna kunDalAya tulasI vana mAlikAya
jalaja sadruSa dEhAya chAru mangaLam ||
---

---
dEvakI suputrAya dEva dEvOttamaya
bhAvajA guruvarAya bhavya mangaLam ||
---

All mangalams to son of Devaki who is a God of devas,
And who is a great pure teacher,
Invaluable Mangalam to him who has lotus like eyes
Who has moon like face and rides on Garuda.

---
punDarIkAkshaya pUrNa chandra vadanaya
andajA vAhanaya atulya mangalam ||
---

---
vimala rUpaya vividha vEdAnta vEdyAya
sumukha chitta kAmita Subhaga [??] mangaLam ||
---

Pleasing Mangalam to the pure form who is an expert in Vedas and Vedanthas,
Who likes to see mind of people with pretty face,
Divine Mangalam to he who lives in the soft mind of Ramadasa,
And to the God who lives in Bhadrachalam.
---
rAmadAsa mRdula hRdaya tAmarasa nivAsAya
swAmi bhadra girivarAya sarva mangaLam||

---

bhaja gOvindaM

భజ గోవిందం

- శ్రీగణేశాయ నమ: -

ఓం స్థాపకయ చ ధర్మస్య సర్వ ధర్మ స్వరూపిణే |
అవతర వరిష్ఠాయ రామకృష్ణాయ తే నమ: ||

భజగోవిందం భజగోవిందం
గోవిందం భజమూఢమతే |
సంప్రాప్తే సన్నిహితే కాలే
నహి నహి రక్షతి డుకృఞ్కరణే ||1||

మూఢ జహీహి ధనాగమతృష్ణాం
కురు సద్బుద్ధిం మనసి వితృష్ణాం |
యల్లభసే నిజకర్మోపాత్తం
విత్తం తేన వినోదయ చిత్తం ||2||

నారీస్తనభర నాభీదేశం
దృష్ట్వా మాగామోహావేశం |
ఎతన్మాంసావసాది వికారం
మనసి విచింతయ వారం వారం ||3||

నలినీదలగత జలమతితరలం
తద్వజ్జీవితమతిశయచపలం |
విద్ధి వ్యాధ్యభిమానగ్రస్తం
లోకం శోకహతం చ సమస్తం ||4||

యావద్విత్తోపార్జన సక్త:
స్తావన్నిజ పరివారో రక్త: |
పశ్చాజ్జీవతి జర్జర దేహే
వార్తాం కోఽపి న పృచ్ఛతి గేహే ||5||

యావత్పవనో నివసతి దేహే
తావత్పృచ్ఛతి కుశలం గేహే |
గతవతి వాయౌ దేహాపాయే
భార్యా బిభ్యతి తస్మింకాయే ||6||

బాలస్తావత్క్రీడాసక్త:
తరుణస్తావత్తరుణీసక్త: |
వృద్ధస్తావచ్చింతాసక్త:
పరే బ్రహ్మణి కోఽపి న సక్త: ||7||

కాతే కాంతా కస్తే పుత్ర:
సంసారోఽయమతీవ విచిత్ర: |
కస్య త్వం క: కుత ఆయాత:
తత్త్వం చింతయ తదిహ భ్రాత: ||8||

సత్సఙ్గత్వే నిస్స్ఙ్గత్వం
నిస్సఙ్గత్వే నిర్మోహత్వం |
నిర్మోహత్వే నిశ్చలతత్త్వం
నిశ్చలతత్త్వే జీవన్ముక్తి: ||9||

వయసిగతే క: కామవికార:
శుష్కే నీరే క: కాసార: |
క్షీణేవిత్తే క: పరివార:
జ్ఞాతే తత్త్వే క: సంసార: ||10||

మా కురు ధన జన యౌవన గర్వం
హరతి నిమేషాత్కాల: సర్వం |
మాయామయమిదమఖిలం హిత్వా
బ్రహ్మపదం త్వం ప్రవిశ విదిత్వా ||11||

దినయామిన్యౌ సాయం ప్రాత:
శిశిరవసంతౌ పునరాయాత: |
కాల: క్రీడతి గచ్ఛత్యాయు:
తదపి న ముఞ్చత్యాశావాయు: ||12||

ద్వాదశమఞ్జరికాభిరశేష:
కథితో వైయాకరణస్యైష: |
ఉపదేశో భూద్విద్యానిపుణై:
శ్రీమచ్ఛంకరభగవచ్ఛరణై: ||12అ||

కాతే కాంతా ధన గతచింతా
వాతుల కిం తవ నాస్తి నియంతా |
త్రిజగతి సజ్జనసం గతిరైకా
భవతి భవార్ణవతరణే నౌకా ||13||

జటిలో ముణ్డీ లుఞ్ఛితకేశ:
కాషాయాంబరబహుకృతవేష: |
పశ్యన్నపి చన పశ్యతి మూఢ:
ఉదరనిమిత్తం బహుకృతవేష: ||14||

అఙ్గం గలితం పలితం ముణ్డం
దశనవిహీనం జతం తుణ్డం |
వృద్ధో యాతి గృహీత్వా దణ్డం
తదపి న ముఞ్చత్యాశాపిణ్డం ||15||

అగ్రే వహ్ని: పృష్ఠేభాను:
రాత్రౌ చుబుకసమర్పితజాను: |
కరతలభిక్షస్తరుతలవాస:
తదపి న ముఞ్చత్యాశాపాశ: ||16||

కురుతే గఙ్గాసాగరగమనం
వ్రతపరిపాలనమథవా దానం |
జ్ఞానవిహిన: సర్వమతేన
ముక్తిం న భజతి జన్మశతేన ||17||

సుర మందిర తరు మూల నివాస:
శయ్యా భూతల మజినం వాస: |
సర్వ పరిగ్రహ భోగ త్యాగ:
కస్య సుఖం న కరోతి విరాగ: ||18||

యోగరతో వాభోగరతోవా
సఙ్గరతో వా సఙ్గవీహిన: |
యస్య బ్రహ్మణి రమతే చిత్తం
నందతి నందతి నందత్యేవ ||19||

భగవద్గీతా కిఞ్చిదధీతా
గఙ్గా జలలవ కణికాపీతా |
సకృదపి యేన మురారి సమర్చా
క్రియతే తస్య యమేన న చర్చా ||20||

పునరపి జననం పునరపి మరణం
పునరపి జననీ జఠరే శయనం |
ఇహ సంసారే బహుదుస్తారే
కృపయాఽపారే పాహి మురారే ||21||

రథ్యా చర్పట విరచిత కంథ:
పుణ్యాపుణ్య వివర్జిత పంథ: |
యోగీ యోగనియోజిత చిత్తో
రమతే బాలోన్మత్తవదేవ ||22||

కస్త్వం కోఽహం కుత ఆయాత:
కా మే జననీ కో మే తాత: |
ఇతి పరిభావయ సర్వమసారం
విశ్వం త్యక్త్వా స్వప్న విచారం ||23||

త్వయి మయి చాన్యత్రైకో విష్ణు:
వ్యర్థం కుప్యసి మయ్యసహిష్ణు: |
భవ సమచిత్త: సర్వత్ర త్వం
వాఞ్ఛస్యచిరాద్యది విష్ణుత్వం ||24||

శత్రౌ మిత్రే పుత్రే బంధౌ
మా కురు యత్నం విగ్రహసంధౌ |
సర్వస్మిన్నపి పశ్యాత్మానం
సర్వత్రోత్సృజ భేదాజ్ఞానం ||25||

కామం క్రోధం లోభం మోహం
త్యక్త్వాఽత్మానం భావయ కోఽహం |
ఆత్మజ్ఞాన విహీనా మూఢా:
తే పచ్యంతే నరకనిగూఢా: ||26||

గేయం గీతా నామ సహస్రం
ధ్యేయం శ్రీపతి రూపమజస్రం |
నేయం సజ్జన సఙ్గే చిత్తం
దేయం దీనజనాయ చ విత్తం ||27||

సుఖత: క్రియతే రామాభోగ:
పశ్చాద్ధంత శరీరే రోగ: |
యద్యపి లోకే మరణం శరణం
తదపి న ముఞ్చతి పాపాచరణం ||28||

అర్థమనర్థం భావయ నిత్యం
నాస్తితత: సుఖలేశ: సత్యం |
పుత్రాదపి ధన భాజాం భీతి:
సర్వత్రైషా విహిఆ (??) రీతి: ||29||

ప్రాణాయామం ప్రత్యాహారం
నిత్యానిత్య వివేకవిచారం |
జాప్యసమేత సమాధివిధానం
కుర్వవధానం మహదవధానం ||30||

గురుచరణాంబుజ నిర్భర భకత: ??
సంసారాదచిరాద్భవ ముక్త: |
సేంద్రియమానస నియమాదేవం
ద్రక్ష్యసి నిజ హృదయస్థం దేవం ||31||

మూఢ: కశ్చన వైయాకరణో
డుకృఞ్కరణాధ్యయన ధురిణ: |
శ్రీమచ్ఛంకర భగవచ్ఛిష్యై
బోధిత ఆసిచ్ఛోధితకరణ: ||32||

భజగోవిందం భజగోవిందం
గోవిందం భజమూఢమతే |
నామస్మరణాదన్యముపాయం
నహి పశ్యామో భవతరణే ||33||

ఇతి శ్రీమద్ఛంకరభగవత: కృతౌ
భజ గోవిందం సంపూర్ణం ||

SrI dakshiNAmUrti stOtram

శ్రీ దక్షిణాముర్తి స్తోత్రం

- శ్రీగణేశాయ నమ: -

- శంకరాచర్య ప్రార్థన -
శ్రుతి స్మృతి పురాణానాం ఆలయం కరుణాలయం |
నమామి భగవత్పాదం శంకరం లోకశంకరం ||

విశ్వం దర్పణదృశ్యమాన నగరీతుల్యం నిజాంతర్గతం
పశ్యన్నాత్మని మాయయా బహిరివోద్భూతం యథా నిద్రయా |
యః సాక్షాత్కురుతే ప్రబోధసమయే స్వాత్మానమేవాద్వయం
తస్మై శ్రీగురుమూర్తయే నమ ఇదం శ్రీదక్షిణామూర్తయే || 1||

బీజస్యాంతరివాంకురో జగదిదం ప్రాఙ్నిర్వికల్పం పునః
మాయాకల్పితదేశకాలకలనా వైచిత్ర్యచిత్రీకృతం |
మాయావీవ విజృంభయత్యపి మహాయోగీవ యః స్వేచ్ఛయా
తస్మై శ్రీగురుమూర్తయే నమ ఇదం శ్రీదక్షిణామూర్తయే || 2||

యస్యైవ స్ఫురణం సదాత్మకమసత్కల్పార్థకం భాసతే
సాక్షాత్తత్త్వమసీతి వేదవచసా యో బోధయత్యాశ్రితాన్ |
యత్సాక్షాత్కరణాద్భవేన్న పునరావృత్తిర్భవాంభోనిధౌ
తస్మై శ్రీగురుమూర్తయే నమ ఇదం శ్రీదక్షిణామూర్తయే || 3||

నానాచ్ఛిద్ర ఘటో దరస్థిత మహా దీప ప్రభా భాస్వరం
జ్ఞానం యస్య తు చక్షురాది కరణ ద్వారా బహి: స్పందతే |
జానామీతి తమేవ భాంతం అనుభాత్య ఏతత్ సమస్తం జగత్
తస్మై శ్రీగురుమూర్తయే నమ ఇదం శ్రీదక్షిణామూర్తయే || 4||

దేహం ప్రాణమపీంద్రియాణ్యపి చలాం బుద్ధిం చ శూన్యం విదుః
స్త్రీబాలాంధజడోపమాస్త్వహమితి భ్రాంతా భృశం వాదినః |
మాయాశక్తివిలాసకల్పితమహా వ్యామోహసంహారిణే
తస్మై శ్రీగురుమూర్తయే నమ ఇదం శ్రీదక్షిణామూర్తయే || 5||

రాహుగ్రస్తదివాకరేందుసదృశో మాయాసమాచ్ఛాదనాత్
సన్మాత్రః కరణోపసంహరణతో యోఽభూత్సుషుప్తః పుమాన్ |
ప్రాగస్వాప్సమితి ప్రబోధసమయే యః ప్రత్యభిజ్ఞాయతే
తస్మై శ్రీగురుమూర్తయే నమ ఇదం శ్రీదక్షిణామూర్తయే || 6||

బాల్యాదిష్వపి జాగ్రదాదిషు తథా సర్వాస్వవస్థాస్వపి
వ్యావృత్తాస్వనువర్తమానమహమిత్యంతః స్ఫురంతం సదా |
స్వాత్మానం ప్రకటీకరోతి భజతాం యో ముద్రయా భద్రయా
తస్మై శ్రీగురుమూర్తయే నమ ఇదం శ్రీదక్షిణామూర్తయే || 7||

విశ్వం పశ్యతి కార్యకారణతయా స్వస్వామిసంబంధతః
శిష్యాచార్యతయా తథైవ పితృపుత్రాద్యాత్మనా భేదతః |
స్వప్నే జాగ్రతి వా య ఏష పురుషో మాయాపరిభ్రామితః
తస్మై శ్రీగురుమూర్తయే నమ ఇదం శ్రీదక్షిణామూర్తయే || 8||

భూరంభాంస్యనలోఽనిలోఽమ్బరమహర్నాథో హిమాంశుః పుమాన్
ఇత్యాభాతి చరాచరాత్మకమిదం యస్యైవ మూర్త్యష్టకం |
నాన్యత్కించన విద్యతే విమృశతాం యస్మాత్పరస్మాద్విభోః
తస్మై శ్రీగురుమూర్తయే నమ ఇదం శ్రీదక్షిణామూర్తయే || 9||

సర్వాత్మత్వమితి స్ఫుటీకృతమిదం యస్మాదముష్మిన్ స్తవే
తేనాస్య శ్రవణాత్తదర్థమననాద్ధ్యానాచ్చ సంకీర్తనాత్ |
సర్వాత్మత్వమహావిభూతిసహితం స్యాదీశ్వరత్వం స్వతః
సిద్ధ్యేత్తత్పునరష్టధా పరిణతం చైశ్వర్యమవ్యాహతం || 10||

వటవిటపిసమీపే భూమిభాగే నిషణ్ణం
సకలమునిజనానాం జ్ఞానదాతారమారాత్ |
త్రిభువనగురుమీశం దక్షిణామూర్తిదేవం
జననమరణదుఃఖచ్ఛేదదక్షం నమామి ||

గురవే సర్వలోకానాం భిషజే భవ రోగిణాం |
నిధయే సర్వ విద్యానాం శ్రీ దక్షిణామూర్తయే నమ: ||

ఇతి శ్రీ శంకరాచార్య విరచిత దక్షిణామూర్తి స్తోత్రం సంపూర్ణం ||

mArgabandhu stOtram

మార్గబంధు స్తోత్రం

- శ్రీగణేశాయ నమ: -

శంభో మహాదేవ దేవ శివ
శంభో మహాదేవ దేవేశ శంభో
శంభో మహాదేవ దేవ

ఫాలావనమ్రత్కిరీటం ఫాలనేత్రార్చిషా దగ్ధపఞ్చేషుకీటం |
శూలాహతారాతికూటం శుద్ధమర్ధేన్దుచూడం
భజే మార్గబంధుం .. శంభో |1|

అఙ్గే విరాజద్భుజఙ్గం అభ్రగఙ్గాతరఙ్గాభిరామోత్తమాఙ్గం |
ఓంకారవాటీకురఙ్గం సిద్ధసంసేవితాన్ఘ్రిం
భజే మార్గబంధుం .. శంభో |2|

నిత్యం చిదానందరూపం నిహ్నుతాశేషలోకేశవైరిప్రతాపం |
కార్తస్వరాగేన్ద్రచాపం కృత్తివాసం
భజే దివ్య సన్మార్గబంధుం .. శంభో |3|

కన్దర్పదర్పఘ్నమీశం కాలకంఠం మహేశం మహావ్యోమకేశం |
కున్దాభదన్తం సురేశం కోటిసూర్యప్రకాశం
భజే మార్గబంధుం .. శంభో |4|

మన్దారభూతేరుదారం మన్దరాగేన్ద్రసారం మహాగౌర్యదూరం |
సిందూరదూరప్రచారం సింధురజాతిధీరం
భజే మార్గబంధుం .. శంభో |5|

అప్పయ్యయజ్జ్వేన్ద్ర గీతం స్తోత్రరాజం పఠేద్యస్తు భక్త్యా ప్రయాణే |
తస్యార్థసిద్ధిం విధత్తే మార్గమధేఽభయం చాశుతోషో మహేశ: |6|

శంభో మహాదేవ దేవ శివ
భజే మార్గబంధుం .. భజే మార్గబంధుం .. భజే మార్గబంధుం ..
శంభో మహాదేవ దేవేశ శంభో
శంభో మహాదేవ దేవ

ఇతి అప్పయ్య దీక్షితప్రణితం శ్రీమార్గబంధు స్తోత్రం సంపూర్ణం ||

gajEndra mOksham

శ్రీమద్భాగవత పురాణే - అష్టమస్కందే
- గజేంద్ర మోక్షం -

- శ్రీగణేశాయ నమ: -

శ్రీశుక ఉవాచ (8.1.17-8.1.30) -
...
...
హరిరిత్యాహృతో యేన గజేంద్రో మోచితో గ్రహాత్

శ్రీరాజోవాచ (8.1.31-8.1.32) -
బాదరాయణ ఏతత్తే శ్రోతుమిచ్ఛామహే వయం
హరిర్యథా గజపతిం గ్రాహగ్రస్తమమూముచత్
తత్కథాసు మహత్పుణ్యం ధన్యం స్వస్త్యయనం శుభం
యత్ర యత్రోత్తమశ్లోకో భగవాన్గీయతే హరి:

శ్రీసూత ఉవాచ (8.1.33-8.1.33) -
పరీక్షితైవం స తు బాదరాయణి: ప్రాయోపవిష్టేన కథాసు చోదిత:
ఉవాచ విప్రా: ప్రతినంద్య పార్థివం ముదా మునీనాం సదసి స్మ శృణ్వతాం

శ్రీశుక ఉవాచ (8.2.1-8.2.33) -
ఆసీద్గిరివరో రాజంస్త్రికూట ఇతి విశ్రుత:
క్షీరోదేనావృత: శ్రీమాన్యోజనాయుతముచ్ఛ్రిత:
తావతా విస్తృత: పర్యక్త్రిభి: శృఙ్గై: పయోనిధిం
దిశహ్ ఖం రోచయన్నాస్తే రౌప్యాయసహిరణ్మయై:
అన్యైశ్చ కకుభ: సర్వా రత్నధాతువిచిత్రితై:
నానాద్రుమలతాగుల్మైర్నిర్ఘోషైర్నిర్ఝరాంభసాం
స చావనిజ్యమానాఙ్ఘ్రి: సమంతాత్పయఊర్మిభి:
కరోతి శ్యామలాం భూమిం హరిన్మరకతాశ్మభి:
సిద్ధచారణగన్ధర్వైర్విద్యాధరమహోరగై:
కిన్నరైరప్సరోభిశ్చ క్రీడద్భిర్జుష్టకందర:
యత్ర సఙ్గీతసన్నాదైర్నదద్గుహమమర్షయా
అభిగర్జంతి హరయ: శ్లాఘిన: పరశఙ్కయా
నానారణ్యపశువ్రాత సఙ్కులద్రోణ్యలఙ్కృత:
చిత్రద్రుమసురోద్యాన కలకణ్ఠవిహఙ్గమ:
సరిత్సరోభిరచ్ఛోదై: పులినైర్మణివాలుకై:
దేవస్త్రీమజ్జనామోద సౌరభామ్బ్వనిలైర్యుత:
తస్య ద్రోణ్యాం భగవతో వరుణస్య మహాత్మన:
ఉద్యానమృతుమన్నామ ఆక్రీడం సురయోషితాం
సర్వతోఽలఙ్కృతం దివ్యైర్నిత్యపుష్పఫలద్రుమై:
మన్దారై: పారిజాతైశ్చ పాటలాశోకచంపకై:
చూతై: పియాలై: పనసైరామ్రైరామ్రాతకైరపి
క్రముకైర్నారికెలైశ్చ ఖర్జూరైర్బీజపూరకై:
మధుకై: శాలతాలైశ్చ తమాలైరసనార్జునై:
అరిష్టొడుంబరప్లక్షైర్వటై: కింశుకచందనై:
పిచుమర్దై: కోవిదారై: సరలై: సురదారుభి:
ద్రాక్షేక్షురంభాజంబుభిర్బదర్యక్షాభయామలై:
బిల్వై: కపిత్థైర్జంబీరైర్వృతో భల్లాతకాదిభి:
తస్మిన్సర: సువిపులం లసత్కాఞ్చనపఙ్కజం
కుముదోత్పలకహ్లార శతపత్రశ్రియోర్జితం
మత్తషట్పదనిర్ఘుష్టం శకున్తైశ్చ కలస్వనై:
హంసకారణ్డవాకీర్ణం చక్రాహ్వై: సారసైరపి
జలకుక్కుటకోయష్టి దాత్యూహకులకూజితం
మత్స్యకచ్ఛపసఞ్చార చలత్పద్మరజ:పయ:
కదంబవేతసనల నీపవఞ్జులకైర్వృతం
కుందై: కురుబకాశోకై: శిరీషై: కూటజేఙ్గుదై:
కుబ్జకై: స్వర్ణయూథీభిర్నాగపున్నాగజాతిభి:
మల్లికాశతపత్రైశ్చ మాధవీజాలకాదిభి:
శోభితం తీరజైశ్చాన్యైర్నిత్యర్తుభిరలం ద్రుమై:
తత్రైకదా తద్గిరికాననాశ్రయ: కరేణుభిర్వారణయూథపశ్చరన్
సకణ్టకం కీచకవేణువేత్రవద్విశాలగుల్మం ప్రరుజన్వనస్పతీన్
యద్గంధమాత్రాద్ధరయో గజేన్ద్రా వ్యాఘ్రాదయో వ్యాలమృగా: సఖడ్గా:
మహోరగాశ్చాపి భయాద్ద్రవన్తి సగౌరకృష్ణా: సరభాశ్చమర్య:
వృకా వరాహా మహిషర్క్షశల్యా గోపుచ్ఛశాలావృకమర్కటాశ్చ
అన్యత్ర క్షుద్రా హరిణా: శశాదయశ్చరన్త్యభీతా యదనుగ్రహేణ
స ఘర్మతప్త: కరిభి: కరేణుభిర్వృతో మదచ్యుత్కరభైరనుద్రుత:
గిరిం గరిమ్ణా పరిత: ప్రకమ్పయన్నిషేవ్యమాణోఽలికులైర్మదాశనై:
సరీఽనిలం పఙ్కజరేణురూషితం జిఘ్రన్విదూరాన్మదవిహ్వలేక్షణ:
వృత: స్వయూథేన తృషార్దితేన తత్సరోవరాభ్యాసమథాగమద్ద్రుతం
విగాహ్య తస్మిన్నమృతాంబు నిర్మలం హేమారవిందోత్పలరేణురూషితం
పపౌ నికామం నిజపుష్కరోద్ధృతమాత్మానమద్భి: స్నపయన్గతక్లమ:
స పుష్కరేణోద్ధృతశీకరాంబుభిర్నిపాయయన్సంస్నపయన్యథా గృహీ
ఘృణీ కరేణు: కరభాంశ్చ దుర్మదో నాచష్ట కృచ్ఛ్రం కృపణోఽజమాయయా
తం తత్ర కశ్చిన్నృప దైవచోదితో గ్రాహో బలీయాంశ్చరణే రుషాగ్రహీత్
యదృచ్ఛయైవం వ్యసనం గతో గజో యథాబలం సోఽతిబలో విచక్రమే
తథాతురం యూథపతిం కరేణవో వికృష్యమాణం తరసా బలీయసా
విచుక్రుశుర్దీనధియోఽపరే గజా: పార్ష్ణిగ్రహాస్తారయితుం న చాశకన్
నియుధ్యతోరేవమిభేన్ద్రనక్రయోర్వికర్షతోరంతరతో బహిర్మిథ:
సమా: సహస్రం వ్యగమన్మహీపతే సప్రాణయోశ్చిత్రమమంసతామరా:
తతో గజేన్ద్రస్య మనోబలౌజసాం కాలేన దీర్ఘేణ మహానభూద్వ్యయ:
వికృష్యమాణస్య జలేఽవసీదతో విపర్యయోఽభూత్సకలం జలౌకస:
ఇత్థం గజేన్ద్ర: స యదాప సఙ్కటం ప్రాణస్య దేహీ వివశో యదృచ్ఛయా
అపారయన్నాత్మవిమోక్షణే చిరం దధ్యావిమాం బుద్ధిమథాభ్యపద్యత
న మామిమే జ్ఞాతయ ఆతురం గజా: కుత: కరిణ్య: ప్రభవన్తి మోచితుం
గ్రాహేణ పాశేన విధాతురావృతోఽప్యహం చ తం యామి పరం పరాయణం
య: కశ్చనేశో బలినోఽన్తకోరగాత్ప్రచణ్డవేగాదభిధావతో భృశం
భీతం ప్రపన్నం పరిపాతి యద్భయాన్మృత్యు: ప్రధావత్యరణం తమీమహి

శ్రీబాదరాయణిరువాచ (8.3.1-8.3.1) -
ఏవం వ్యవసితో బుద్ధ్యా సమాధాయ మనో హృది
జజాప పరమం జాప్యం ప్రాగ్జన్మన్యనుశిక్షితం

శ్రీగజేంద్ర ఉవాచ (8.3.2-8.3.29) -
ఓం నమో భగవతే తస్మై యత ఏతచ్చిదాత్మకం
పురుషాయాదిబీజాయ పరేశాయాభిధీమహీ
యస్మిన్నిదం యతశ్చేదం యేనేదం య ఇదం స్వయం
యోఽస్మాత్పరస్మాచ్చ పరస్తం ప్రపద్యే స్వయంభువం
య: స్వాత్మనీదం నిజమాయయార్పితం క్వచిద్విభాతం క్వ చ తత్తిరోహితం
అవిద్ధదృక్సాక్ష్యుభయం తదీక్షతే స ఆత్మమూలోఽవతు మాం పరాత్పర:
కాలేన పఞ్చత్వమితేషు కృత్స్నశో లోకేషు పాలేషు చ సర్వహేతుషు
తమస్తదాసీద్ గహనం గభీరం యస్తస్య పారేఽభివిరాజతే విభు:
న యస్య దేవా ఋషయ: పదం విదుర్జంతు: పున: కోఽర్హతి గంతుమీరితుం
యథా నటస్యాకృతిభిర్విచేష్టతో దురత్యయానుక్రమణ: స మావతు
దిదృక్షవో యస్య పదం సుమఙ్గలం విముక్తసఙ్గా మునయ: సుసాధవ:
చరంత్యలోకవ్రతమవ్రణం వనే భూతాత్మభూతా: సుహృద: స మే గతి:
న విద్యతే యస్య చ జన్మ కర్మ వా న నామరూపే గుణదోష ఏవ వా
తథాపి లోకాప్యయసంభవాయ య: స్వమాయయా తాన్యనుకాలమృచ్ఛతి
తస్మై నమ: పరేశాయ బ్రహ్మణేఽనంతశక్తయే
అరూపాయోరురూపాయ నమ ఆశ్చర్యకర్మణే
నమ ఆత్మప్రదీపాయ సాక్షిణే పరమాత్మనే
నమో గిరాం విదూరాయ మనసశ్చేతసామపి
సత్త్వేన ప్రతిలభ్యాయ నైష్కర్మ్యేణ విపశ్చితా
నమ: కైవల్యనాథాయ నిర్వాణసుఖసంవిదే
నమ: శాంతాయ ఘోరాయ మూఢాయ గుణధర్మిణే
నిర్విశేషాయ సామ్యాయ నమో జ్ఞానఘనాయ చ
క్షేత్రజ్ఞాయ నమస్తుభ్యం సర్వాధ్యక్షాయ సాక్షిణే
పురుషాయాత్మమూలాయ మూలప్రకృతయే నమ:
సర్వేంద్రియగుణద్రష్ట్రే సర్వప్రత్యయహేతవే
అసతాచ్ఛాయయోక్తాయ సదాభాసాయ తే నమ:
నమో నమస్తేఽఖిలకారణాయ నిష్కారణాయాద్భుతకారణాయ
సర్వాగమామ్నాయమహార్ణవాయ నమోఽపవర్గాయ పరాయణాయ
గుణారణిచ్ఛన్నచిదుష్మపాయ తత్క్షోభవిస్ఫూర్జితమానసాయ
నైష్కర్మ్యభావేన వివర్జితాగమ స్వయంప్రకాశాయ నమస్కరోమి
మాదృక్ప్రపన్నపశుపాశవిమోక్షణాయ ముక్తాయ భూరికరుణాయ నమోఽలయాయ
స్వాంశేన సర్వతనుభృన్మనసి ప్రతీత ప్రత్యగ్దృశే భగవతే బృహతే నమస్తే
ఆత్మాత్మజాప్తగృహవిత్తజనేషు సక్తైర్దుష్ప్రాపణాయ గుణసఙ్గవివర్జితాయ
ముక్తాత్మభి: స్వహృదయే పరిభావితాయ జ్ఞానాత్మనే భగవతే నమ ఈశ్వరాయ
యం ధర్మకామార్థవిముక్తికామా భజంత ఇష్టాం గతిమాప్నువంతి
కిం చాశిషో రాత్యపి దేహమవ్యయం కరోతు మేఽదభ్రదయో విమోక్షణం
ఏకాంతినో యస్య న కఞ్చనార్థం వాఞ్ఛంతి యే వై భగవత్ప్రపన్నా:
అత్యద్భుతం తచ్చరితం సుమఙ్గలం గాయంత ఆనందసముద్రమగ్నా:
తమక్షరం బ్రహ్మ పరం పరేశమవ్యక్తమాధ్యాత్మికయోగగమ్యం
అతీంద్రియం సూక్ష్మమివాతిదూరమనంతమాద్యం పరిపూర్ణమీడే
యస్య బ్రహ్మాదయో దేవా వేదా లోకాశ్చరాచరా:
నామరూపవిభేదేన ఫల్గ్వ్యా చ కలయా కృతా:
యథార్చిషోఽగ్నే: సవితుర్గభస్తయో నిర్యాంతి సంయాంత్యసకృత్స్వరోచిష:
తథా యతోఽయం గుణసంప్రవాహో బుద్ధిర్మన: ఖాని శరీరసర్గా:
స వై న దేవాసురమర్త్యతిర్యఙ్న స్త్రీ న షణ్ఢో న పుమాన్న జంతు:
నాయం గుణ: కర్మ న సన్న చాసన్నిషేధశేషో జయతాదశేష:
జిజీవిషే నాహమిహాముయా కిమంతర్బహిశ్చావృతయేభయోన్యా
ఇచ్ఛామి కాలేన న యస్య విప్లవస్తస్యాత్మలోకావరణస్య మోక్షం
సోఽహం విశ్వసృజం విశ్వమవిశ్వం విశ్వవేదసం
విశ్వాత్మానమజం బ్రహ్మ ప్రణతోఽస్మి పరం పదం
యోగరంధితకర్మాణో హృది యోగవిభావితే
యోగినో యం ప్రపశ్యంతి యోగేశం తం నతోఽస్మ్యహం
నమో నమస్తుభ్యమసహ్యవేగ శక్తిత్రయాయాఖిలధీగుణాయ
ప్రపన్నపాలాయ దురంతశక్తయే కదింద్రియాణామనవాప్యవర్త్మనే
నాయం వేద స్వమాత్మానం యచ్ఛక్త్యాహంధియా హతం
తం దురత్యయమాహాత్మ్యం భగవంతమితోఽస్మ్యహం

శ్రీశుక ఉవాచ (8.3.30-8.3.33) -
ఏవం గజేంద్రముపవర్ణితనిర్విశేషం
బ్రహ్మాదయో వివిధలిఙ్గభిదాభిమానా:
నైతే యదోపససృపుర్నిఖిలాత్మకత్వాత్
తత్రాఖిలామరమయో హరిరావిరాసీత్
తం తద్వదార్తముపలభ్య జగన్నివాస:
స్తోత్రం నిశమ్య దివిజై: సహ సంస్తువద్భి:
ఛందోమయేన గరుడేన సముహ్యమానశ్
చక్రాయుధోఽభ్యగమదాశు యతో గజేంద్ర:
సోఽన్త:సరస్యురుబలేన గృహీత ఆర్తో
దృష్ట్వా గరుత్మతి హరిం ఖ ఉపాత్తచక్రం
ఉత్క్షిప్య సామ్బుజకరం గిరమాహ కృచ్ఛ్రాన్
నారాయణాఖిలగురో భగవన్నమస్తే
తం వీక్ష్య పీడితమజ: సహసావతీర్య
సగ్రాహమాశు సరస: కృపయోజ్జహార
గ్రాహాద్విపాటితముఖాదరిణా గజేంద్రం
సంపశ్యతాం హరిరమూముచదుచ్ఛ్రియాణాం

శ్రీశుక ఉవాచ (8.4.1-8.4.10) -
తదా దేవర్షిగంధర్వా బ్రహ్మేశానపురోగమా:
ముముచు: కుసుమాసారం శంసంత: కర్మ తద్ధరే:
నేదుర్దున్దుభయో దివ్యా గన్ధర్వా ననృతుర్జగు:
ఋషయశ్చారణా: సిద్ధాస్తుష్టువు: పురుషోత్తమం
యోఽసౌ గ్రాహ: స వై సద్య: పరమాశ్చర్యరూపధృక్
ముక్తో దేవలశాపేన హూహూర్గన్ధర్వసత్తమ:
ప్రణమ్య శిరసాధీశముత్తమశ్లోకమవ్యయం
అగాయత యశోధామ కీర్తన్యగుణసత్కథం
సోఽనుకంపిత ఈశేన పరిక్రమ్య ప్రణమ్య తం
లోకస్య పశ్యతో లోకం స్వమగాన్ముక్తకిల్బిష:
గజేన్ద్రో భగవత్స్పర్శాద్విముక్తోఽజ్ఞానబంధనాత్
ప్రాప్తో భగవతో రూపం పీతవాసాశ్చతుర్భుజ:
స వై పూర్వమభూద్రాజా పాణ్డ్యో ద్రవిడసత్తమ:
ఇంద్రద్యుమ్న ఇతి ఖ్యాతో విష్ణువ్రతపరాయణ:
స ఏకదారాధనకాల ఆత్మవాన్గృహీతమౌనవ్రత ఈశ్వరం హరిం
జటాధరస్తాపస ఆప్లుతోఽచ్యుతం సమర్చయామాస కులాచలాశ్రమ:
యదృచ్ఛయా తత్ర మహాయశా ముని: సమాగమచ్ఛిష్యగణై: పరిశ్రిత:
తం వీక్ష్య తూష్ణీమకృతార్హణాదికం రహస్యుపాసీనమృషిశ్చుకోప హ
తస్మా ఇమం శాపమదాదసాధురయం దురాత్మాకృతబుద్ధిరద్య
విప్రావమంతా విశతాం తమిస్రం యథా గజ: స్తబ్ధమతి: స ఎవ

శ్రీశుక ఉవాచ (8.4.11-8.4.16) -
ఎవం శప్త్వా గతోఽగస్త్యో భగవాన్నృప సానుగ:
ఇంద్రద్యుమ్నోఽపి రాజర్షిర్దిష్టం తదుపధారయన్
ఆపన్న: కౌఞ్జరీం యోనిమాత్మస్మృతివినాశినీం
హర్యర్చనానుభావేన యద్గజత్వేఽప్యనుస్మృతి:
ఎవం విమోక్ష్య గజయూథపమబ్జనాభస్
తేనాపి పార్షదగతిం గమితేన యుక్త:
గంధర్వసిద్ధవిబుధైరుపగీయమాన
కర్మాద్భుతం స్వభవనం గరుడాసనోఽగాత్
ఏతన్మహారాజ తవేరితో మయా కృష్ణానుభావో గజరాజమోక్షణం
స్వర్గ్యం యశస్యం కలికల్మషాపహం దు:స్వప్ననాశం కురువర్య శృణ్వతాం
యథానుకీర్తయన్త్యేతచ్ఛ్రెయస్కామా ద్విజాతయ:
శుచయ: ప్రాతరుత్థాయ దు:స్వప్నాద్యుపశాంతయే
ఇదమాహ హరి: ప్రీతో గజేంద్రం కురుసత్తమ
శృణ్వతాం సర్వభూతానాం సర్వభూతమయో విభు:

శ్రీభగవానువాచ (8.4.17-8.4.25) -
యే మాం త్వాం చ సరశ్చేదం గిరికందరకాననం
వేత్రకీచకవేణూనాం గుల్మాని సురపాదపాన్
శృఙ్గాణీమాని ధిష్ణ్యాని బ్రహ్మణో మే శివస్య చ
క్షీరోదం మే ప్రియం ధామ శ్వేతద్వీపం చ భాస్వరం
శ్రీవత్సం కౌస్తుభం మాలాం గదాం కౌమోదకీం మమ
సుదర్శనం పాఞ్చజన్యం సుపర్ణం పతగేశ్వరం
శేషం చ మత్కలాం సూక్ష్మాం శ్రియం దేవీం మదాశ్రయాం
బ్రహ్మాణం నారదమృషిం భవం ప్రహ్రాదమేవ చ
మత్స్యకూర్మవరాహాద్యైరవతారై: కృతాని మే
కర్మాణ్యనంతపుణ్యాని సూర్యం సోమం హుతాశనం
ప్రణవం సత్యమవ్యక్తం గోవిప్రాంధర్మమవ్యయం
దాక్షాయణీర్ధర్మపత్నీ: సోమకశ్యపయోరపి
గఙ్గాం సరస్వతీం నందాం కాళిందీం సితవారణం
ధ్రువం బ్రహ్మఋషీన్సప్త పుణ్యశ్లోకాంశ్చ మానవాన్
ఉత్థాయాపరరాత్రాంతే ప్రయతా: సుసమాహితా:
స్మరంతి మమ రూపాణి ముచ్యంతే తేఽమ్హసోఽఖిలాత్
యే మాం స్తువంత్యనేనాఙ్గ ప్రతిబుధ్య నిశాత్యయే
తెషాం ప్రాణాత్యయె చాహం దదామి విపులాం గతిం

శ్రీశుక ఉవాచ (8.4.26-8.4.26) -
ఇత్యాదిశ్య హృషీకేశ: ప్రాధ్మాయ జలజోత్తమం
హర్షయన్విబుధానీకమారురోహ ఖగాధిపం

శ్రీశుక ఉవాచ (8.5.1-8.5.10) -
రాజన్నుదితమేతత్తే హరే: కర్మాఘనాశనం
గజేంద్రమోక్షణం పుణ్యం రైవతం త్వంతరం శృణు
పఞ్చమో రైవతో నామ మనుస్తామససోదర:
బలివింధ్యాదయస్తస్య సుతా హార్జునపూర్వకా:
విభురింద్ర: సురగణా రాజంభూతరయాదయ:
హిరణ్యరోమా వేదశిరా ఊర్ధ్వబాహ్వాదయో ద్విజా:
పత్నీ వికుణ్ఠా శుభ్రస్య వైకుణ్ఠై: సురసత్తమై:
తయో: స్వకలయా జజ్ఞే వైకుణ్ఠో భగవాన్స్వయం
వైకుణ్ఠ: కల్పితో యేన లోకో లోకనమస్కృత:
రమయా ప్రార్థ్యమానేన దేవ్యా తత్ప్రియకామ్యయా
తస్యానుభావ: కథితో గుణాశ్చ పరమోదయా:
భౌమాన్రేణూన్స విమమే యో విష్ణోర్వర్ణయేద్గుణాన్
షష్ఠశ్చ చక్షుష: పుత్రశ్చాక్షుషో నామ వై మను:
పూరుపూరుషసుద్యుమ్న ప్రముఖాశ్చాక్షుషాత్మజా:
ఇంద్రో మంత్రద్రుమస్తత్ర దేవా ఆప్యాదయో గణా:
మునయస్తత్ర వై రాజణవిష్మద్వీరకాదయ:
తత్రాపి దేవసంభూత్యాం వైరాజస్యాభవత్సుత:
అజితో నామ భగవానంశేన జగత: పతి:
పయోధిం యేన నిర్మథ్య సురాణాం సాధితా సుధా
భ్రమమాణోఽమ్భసి ధృత: కూర్మరూపేణ మందర:

SrI SAradA bhujamgaprayAtAshTakam

శ్రీ శారదా భుజఙ్గప్రయాతాష్టకం

- శ్రీగణేశాయ నమ: -

సువక్షోజకుంభాం సుధాపూర్ణకుంభాం
  ప్రసాదావలంబాం ప్రపుణ్యావలంబాం |
సదాస్యేన్దుబింబాం సదానోష్ఠబింబాం
  భజే శారదాంబామజస్రం మదంబాం |1|

కటాక్షే దయాద్రో కరే జ్ఞానముద్రాం
  కళాభిర్వినిద్రాం కళాపై: సుభద్రాం |
పురస్త్రీం వినిద్రాం పురస్తుఙ్గభద్రాం
  భజే శారదాంబామజస్రం మదంబాం |2|

లలామాఙ్కఫాలాం లసద్గానలోలాం
  స్వభక్తైకపాలాం యశ:శ్రీకపోలాం |
కరే త్వక్షమాలాం కనత్ప్రత్నలోలాం
  భజే శారదాంబామజస్రం మదంబాం |3|

సుసీమంతవేణీం దృశా నిర్జితైణీం
  రమత్కీరవాణీం నమద్వజ్రపాణీం |
సుధామన్థరాస్యాం ముదా చిన్త్యవేణీం
  భజే శారదాంబామజస్రం మదంబాం |4|

సుశాంతాం సుదేహాం దృగన్తే కచాన్తాం
  లసత్సల్లతాఙ్గీమనన్తామచిన్త్యాం |
స్మరేత్తాపసై: సఙ్గపూర్వస్థితాం తాం
  భజే శారదాంబామజస్రం మదంబాం |5|

కురఙ్గే తురంగే మృగేన్ద్రే ఖగేంద్రే
  మరాళే మదేభే మహోక్షేఽధిరూఢాం |
మహత్యాం నవమ్యాం సదా సామరూపాం
  భజే శారదాంబామజస్రం మదంబాం |6|

జ్వలత్కాన్తివహ్నిం జగన్మోహనాఙ్గీం
  భజే మానసాంభోజసుభ్రాన్తభృఙ్గీం |
నిజస్తోత్రసంగీతనృత్యప్రభాఙ్గీం
  భజే శారదాంబామజస్రం మదంబాం |7|

భవాంభోజనేత్రాజసంపూజ్యమానాం
  లసన్మన్దహాసప్రభావక్త్రచిహ్నాం |
చలచ్చఞ్చలాచారూతాటఙ్కకర్ణో
  భజే శారదాంబామజస్రం మదంబాం |8|

ఇతి శ్రీమత్పరమహంసపరివ్రాజకాచార్యస్య
   శ్రీగోవిన్దభగవత్పూజ్యపాదశిష్యస్య
   శ్రీమఛ్చంకరభగవత కృతౌ
శారదా భుజఙ్గప్రయాతాష్టకం సంపూర్ణం ||

SrI SAradA bhujamgaprayAta stavanam

శ్రీ శారదా భుజఙ్గప్రయాత స్తవనం

- శ్రీగణేశాయ నమ: -

ఓం స్మితోద్ధూతరాకా నిశానాయకాయై
  కపోలప్రభానిర్జితాదర్శకాయై |
స్వనేత్రావధూతాఞ్గజాతధ్వజాయై
  సరోజోత్థ సత్యై నమ: శారదాయై |1|

భవాంబోధిపారం న యంత్యై స్వభక్తాన్
  వినాఽయాసలేశం కృపానౌకయైవ |
భవాంభోజనేత్రాది సంసేవితాయై
  అజస్రం హి కుర్మో నమ: శారదాయై |2|

సుధాకుంభముద్రావిరాజత్కరాయై
  వ్యథాశూన్యచిత్తై: సదా సేవితాయై |
క్రుధాకామలోభాదినిర్వాపణాయై
  విధాతృప్రియాయై నమ: శారదాయై |3|

నతేష్టప్రదానాయ భూమిం గతాయై
  గతేనాచ్ఛబర్హాభిమానం హరంత్యై |
స్మితేనేందు దర్పం చ తోషాం వ్రజంత్యై
  సుతేనేవ నమ్రైర్నమ: శారదాయై |4|

నతాలీయదారిద్ర్యదు:ఖాపహంత్ర్యై
  తథాభీతిభూతాదిబాధాహరాయై |
ఫణీంద్రాభవేణ్యై గిరీంద్రస్తనాయై
  విధాతృప్రియాయై నమ: శారదాయై |5|

సుధాకుంభముద్రాక్షమాలావిరాజత్
  కరాయై కరాంభోజసమ్మర్దితాయై |
సురాణాం వరాణాం సదా మానినీనాం
  ముదా సర్వదాయై నమ: శారదాయై |6|

సమస్తైశ్చ వేదై: సదాగీతకీర్త్యై
  నిరాశాంతరఞ్గాంబుజాత స్థితాయై |
పురారాతి పద్మాక్ష పద్మోద్భవాద్యై -
  ర్ముదా పూజితాయై నమ: శారదాయై |7|

అవిద్యాపదుద్ధార బద్ధాదరాయై
  తథా బుద్ధి సంపత్ప్రదానోత్సుకాయై |
నతేభ్య: కదాచిత్స్వపాదాంబుజాతే
  విధే: పుణ్యతత్యై నమ: శారదాయై |8|

పదాంభోజనమ్రాన్ కృతేభీతభీతాన్
  ద్రుతం మృత్యుభీతేర్విముక్తాన్ విధాతుం |
సుధాకుంభముద్రాక్షమాలా కరాయై
  ద్రుతం పాయయిత్వా యథా తృప్తి వాణీ |9|

మహాంతో హి మహ్యం హృదంభోరుహాణి
  ప్రమోదాత్సమర్ప్యాసతే సౌఖ్యభాజ: |
ఇతి ఖ్యాపనాయానతానాం కృపాబ్ధే
  సరోజాన్యసంఖ్యాని ధత్సే కిమంబ |10|

శరచ్చంద్రనీకాశవస్త్రేణవీతా
  కనద్భర్మయష్టేరహఙ్కార భేత్రీ |
కిరీటం సతాటఙ్కమత్యన్తరమ్యం
  వహన్తి హృదబ్జే స్ఫురత్వం సుమూర్తి: |11|

నిగృహ్యాక్షవర్గం తపోవాణి కర్తుం
  న శక్నోమి యస్యాదవశ్యాక్షవర్గ: |
తతో మయ్యనాథే దయా పారశూన్యా
  విధేయా విధాతృప్రియే శారదాంబ |12|

విలోక్యాపి లోకో న తృప్తిం ప్రయాతి
  ప్రసన్నం ముఖేన్దుం కలఙ్కాదిశూన్యం |
యదీయం ధ్రువం ప్రత్యహం తాం కృపాబ్ధిం
  భజే శారదాంబామజస్రమ్మదంబాం |13|

పురా చంద్రచూడో ధృతాచార్యరూపో
  గిరౌ శృఙ్గపూర్వే ప్రతిష్ఠాప్య చక్రే |
సమారాధ్య మోదం యయౌ యామపారం
  భజే శారదాంబామజస్రమ్మదంబాం |14|

భవాంబోధిపారం నయన్తీం స్వభక్తాన్
  భవాంభోజనేత్రాజసంపూజ్యమానాం |
భవద్భవ్యభూతాఘ విధ్వంసదక్షాం
  భజే శారదాంబామజస్రమ్మదంబాం |15|

వరాక త్వరా కా తవేష్టప్రదానే
  కథం పుణ్యహీనాయ తుభ్యం దదాని |
ఇతి త్వం గిరాం దేవి మా బ్రూహి యస్మాద్ -
  అఘారణ్యదావానలేతి ప్రసిద్ధా || ఓం ||   |16|

ఇతి దక్షిణామ్నాయ శృఙ్గేరీ
    శ్రీశారదాపీఠాధిపతి శఙ్కరాచార్య జగద్గురువర్యో
    శ్రీ సచ్చిదానంద శివాభినవ నృసింహభారతీ
    మహాస్వామిభి: విరచితం
శ్రీ శారదా భుజఙ్గప్రయాత స్తవనం సంపూర్ణం||

tOTakAShTakaM

తోటకాష్టకం (శంకరాచార్య స్తుతి)

- శ్రీగణేశాయ నమ: -

-- ధ్యానం --
శంకరం శంకరాచార్యం కేశవం బాదరాయణం |
సూత్రభాష్యకృతౌ వందే భగవంతౌ పున: పున: ||

-- అథ అద్వైత పరంపర --
నారాయణం పద్మభువం వసిష్ఠం శక్తిం చ తత్పుత్రపరాశరం చ |
వ్యాసం శుకం గౌడపదం మహాన్తం గోవిందయోగీంద్రమథాస్య శిష్యం ||
శ్రీ శంకరాచార్యమథాస్య పద్మపాదం చ హస్తామలకం చ శిష్యం |
తం తోటకం వాతిర్కకారమన్యానస్మద్గురూన్ సంతతమానతో | అస్మి ||

విదితాఖిలశాస్త్రసుధాజలధే
  మహితోపనిషత్ కథితార్థనిధే |
హృదయే కలయే విమలం చరణం
  భవ శంకర దేశిక మే శరణం |1|

కరుణావరుణాలయ పాలయ మాం
  భవసాగరదు:ఖవిదూనహృదం: |
రచితాఖిలదర్శనతత్త్వవిదం
  భవ శంకర దేశిక మే శరణం |2|

భవతా జనతా సుహితా భవితా
  నిజబోధవిచారణ చారుమతే |
కలయేశ్వరజీవవివేకవిదం
  భవ శంకర దేశిక మే శరణం |3|

భవ ఏవ భవానితి మే నితరాం
  సమజాయత చేతసి కౌతుకితా |
మమ వారయ మోహమహాజలధిం
  భవ శంకర దేశిక మే శరణం |4|

సుకృతేఽధికృతే బహుధా భవతో
  భవితా సమదర్శనలాలసతా |
అతిదీనమిమం పరిపాలయ మాం
  భవ శంకర దేశిక మే శరణం |5|

జగతీమవితుం కలితాకృతయో
  విచరన్తి మహామహసశ్ఛలత: |
అహిమాంశురివాత్ర విభాసి గురో
  భవ శంకర దేశిక మే శరణం |6|

గురుపుంగవ పుంగవకేతన తే
  సమతామయతాం నహి కోఽపి సుధీ: |
శరణాగతవత్సల తత్త్వనిధే
  భవ శంకర దేశిక మే శరణం |7|

విదితా న మయా విశదైకకలా
  న చ కించన కాఞ్చనమస్తి గురో |
ద్రుతమేవ విధేహి కృపాం సహజాం
  భవ శంకర దేశిక మే శరణం |8|

ఇతి శ్రీ తోటకాచార్య కృతౌ తోటకాష్టకం సంపూర్ణం ||

SrIrAma bhujamgaprAyAta stOtram

శ్రీరామ భుజఙ్గప్రయాత స్తోత్రం

- శ్రీగణేశాయ నమ: -

విశుద్ధం పరం సచ్చిదానందరూపం
  గుణాధారమాధారహీనం వరేణ్యం |
మహాన్తం విభాన్తం గుహాన్తం గుణాన్తం
  సుఖాన్తం స్వయం ధామ రామం ప్రపధ్యే  |1|

శివం నిత్యమేకం విభుం తారకాఖ్యం
  సుఖాకారమాకారశూన్యం సుమాన్యం |
మహేశం కలేశం సురేశం పరేశం
  నరేశం నిరీశం మహీశం ప్రపధ్యే   |2|

యదావర్ణయత్కర్ణమూలేఽన్తకాలే
  శివో రామ రామేతి రామేతి కాశ్యాం |
తదేకం పరం తారకబ్రహ్మరూపం
 భజేఽహం భజేఽహం భజేఽహం భజేఽహం  |3|

యత్ = ఆ

ఆవర్ణయత్ = రహస్యంగా చెప్పుట (whisper)
కర్ణ మూలే = చెవులో
అంతకాలే = చనిపోయే సమయంలో

శివ: = పరమశివుడు
రామ రామా ఇతి రామా ఇతి = రామా రామా రామా అని
కాశ్యాం = కాశీలో

తత్ + ఏకం = ఆ రూపం + అవిభజనమైన = అవిభజనమైన ఆ రూపం
పరం = పరమమైన, ఉత్కృష్టమైన
తారకబ్రహ్మరూపం = తారకబ్రహ్మ (సంసార సాగరంలోంచి తప్పించే) రూపంలో

భజేஉహం = భజే+అహం = భజిస్తాను/పూజిస్తాను + నేను = నేను పూజిస్తాను

కాశీలో చనిపోయేవారి అంతకాలంలో ఏ నామం ఆ పరమశివుడే వచ్చి చెవిలో చెపుతాడో, ఆ సంసార సాగరంలోంచి తప్పించే నామాన్ని; ఏకం/అద్వితీయం/అవిభజనీయం అయిన శ్రీరాముని రూపాన్ని నేను పూజిస్తాను.

మహారత్నపీఠే శుభే కల్పమూలే
 సుఖాసీనమాదిత్యకోటిప్రకాశం |
సదా జానకీలక్ష్మణోపేతమేకం
 సదా రామచంద్రం భజేఽహం భజేఽహం  |4|

క్వణద్రత్నమఞ్జీరపాదారవిన్దం
 లసన్మేఖలాచారుపీతామ్బరాఢ్యం |
మహారత్నహారోల్లసత్కౌస్తుభాఙ్గం
 నదచ్చఞ్చరీమఙ్జరీలోలమాలం  |5|

లసచ్చన్ద్రికాస్మేరశోణాధరాభం
 సముద్యత్పతఙ్గేన్దుకోటిప్రకాశం |
నమద్బ్రహ్మరుద్రాదికోటీరరత్న -
 స్ఫురత్కాన్తినీరాజనారాధితాన్ఘ్రిం  |6|

పుర: ప్రాఞ్జలీనాఞ్జనేయాదిభక్తా -
 న్స్వచిన్ముద్రయా భద్రాయ బోధయన్తం |
భజేఽహం భజేఽహం సదా రామచంద్రం
 త్వదన్యం న మన్యే న మన్యే న మన్యే  |7|

యదా మత్సమీపం కృతాన్త: సమేత్య
 ప్రచన్డప్రకోపైర్భటైర్భీషయేన్మాం |
తదావిష్కరోషి త్వదీయం స్వరూపం
 సదాపత్ప్రణాశం సకోదన్డబాణం  |8|

నిజే మానసే మన్దిరే సంనిధేహి
 ప్రసీద ప్రసీద ప్రభో రామచంద్ర |
ససౌమిత్రిణా కైకేయీనన్దనేన
 స్వశక్త్యానుభక్త్యా చ సంసేవ్యమాన  |9|

స్వభక్తాప్రగణ్యై: కపీశైర్మహీశై -
 రనీకైరనేకైశ్చ రామ ప్రసీద |
నమస్తే నమోఽస్త్వీశ రామ ప్రసీద
 ప్రశాధి ప్రశాధి ప్రకాశం ప్రభో మాం  |10|

త్వమేవాసి దైవం పరం మే యదేకం
 సుచైతన్యమేతత్త్వదన్యం న మన్యే |
యతోఽభూదమేయం వియద్వాయుతేజో -
 జలోవ్య్రాదికార్యం చరం చాచరం చ  |11|

నమ: సచ్చిదానన్దరూపాయ తస్మై
 నమో దేవదేవాయ రామాయ తుభ్యం |
నమో జానకీజీవితేశాయ తుభ్యం
 నమ: పున్డరీకాయతాక్షాయ తుభ్యం  |12|

నమో భక్తియుక్తానురక్తాయ తుభ్యం
  నమ: పుణ్యపుఞ్జైకలభ్యాయ తుభ్యం |
నమో వేదవేద్యాయ చాద్యాయ పుంసే
 నమ: సున్దరాయేన్దిరావల్లభాయ  |13|

నమో విశ్వకర్త్రే నమో విశ్వహర్త్రే
  నమో విశ్వభోక్త్రే నమో విశ్వమాత్రే |
నమో విశ్వనేత్రే నమో విశ్వజేత్రే
 నమో విశ్వపిత్రే నమో విశ్వమాత్రే  |14|

నమస్తే నమస్తే సమస్తప్రపఞ్చం
  ప్రభోగప్రయోగప్రమాణప్రవీణ |
మదీయం మనస్త్వత్పదద్వన్ద్వసేవాం
  విధాతుం ప్రవృత్తం సుచైతన్యసిద్ధ్యయై:  |15|

శిలాపి త్వదఙ్ఘ్రిక్షమాసఙ్గిరేణు -
  ప్రసాదాద్ధి చైతన్యమాధత్త రామ |
నరస్త్వత్పదద్వన్ద్వసేవావిధానా -
  త్సుచైతన్యమేతీతి కిం చిత్రమత్ర  |16|

పవిత్రం చరిత్రం విచిత్రం త్వదీయం
  నరా యే స్మరన్త్యన్వహం రామచంద్ర |
భవన్తం భవాన్తం భరన్తం భజన్తో
 లభన్తే కృతాన్తం న పశ్యన్త్యతోఽన్తే  |17|

స పుణ్య స గణ్య శరణ్యో మమాయం
  నరో వేద యో దేవచూడామణిం త్వాం |
సదాకారమేకం చిదానన్దరూపం
  మనోవాగగమ్యం పరంధామ రామ  |18|

ప్రచణ్డప్రతాపప్రభావాభిభూత
  ప్రభూతారివీర ప్రభో రామచంద్ర |
బలం తే కథం వర్ణ్యతేఽతీవ బాల్యే
 యతోఽఖణ్డి చణ్డీశకోదణ్డదణ్డం  |19|

దశగ్రీవముగ్రం సపుత్రం సమిత్రం
  సరిద్దుర్గమధ్యస్థరక్షోగణేశం |
భవన్తం వినా రామ వీరో నరో వా
  సురో వామరో వా జయేత్కస్త్రిలోక్యాం  |20|

సదా రామ రామేతి రామామృతం తే
  సదారామమానన్దనిష్యన్దకన్దం |
పిబన్తం నమన్తం సుదన్తం హసన్తం
  హనూమన్తమన్తర్భజే తం నితాన్తం  |21|

సదా రామ రామేతి రామామృతం తే
  సదారామమానన్దనిష్యన్దకన్దం |
పిబన్నన్వహం నన్వహం నైవ మృత్యో
  ర్బిభేమి ప్రసాదాదసాదాత్తవైవ  |22|

అసీతాసమేతైరకోదణ్డభూషై -
  రసౌమిత్రివన్దైరచణ్డప్రతాపై: |
అలక్కేశకాలైరసుగ్రీవమిత్రై -
  రరామాభిధేయైరలం దైవతైర్న:  |23|

అవీరాసనస్థైరచిన్ముద్రికాఢ్యై -
  రభక్తాఞ్జనేయాదితత్వప్రకాశై: |
అమన్దారమూలైరమన్దారమాలై -
  రరామాభిధేయైరలం దైవతైర్న:  |24|

అసిన్ధుప్రకోపైరవన్ధ్యప్రతాపై -
  రబన్ధుప్రయాణైరమన్దస్మితాఢ్యై: |
అదన్డప్రవాసైరఖణ్డప్రబోధై:
  అరామాభిధేయైరలం దైవతైర్న:  |25|

హరే రామ సీతాపతే రావణారే
  ఖరారే మురారేఽసురారే పరేతి |
లపన్తం నయన్తం సదాకాలమేవం
  సమాలోకయాలోకయాశేషబన్ధో  |26|

నమస్తే సుమిత్రాసుపుత్రాభివన్ద్య
  నమస్తే సదా కైకయీనన్దనేఢ్య |
నమస్తే సదా వానరాధీశవన్ధ్య
  నమస్తే నమస్తే సదా రామచంద్ర  |27|

ప్రసీద ప్రసీద ప్రచణ్డప్రతాప
  ప్రసీద ప్రసీద ప్రచణ్డారికాల |
ప్రసీద ప్రసీద ప్రపన్నానుకమ్పిన్
  ప్రసీద ప్రసీద ప్రభో రామచంద్ర   |28|

భుజఙ్గప్రయాతం పరం వేదసారం
  ముదా రామచన్ద్రస్య భక్త్యా చ నిత్యం |
పఠన్సన్తతం చిన్తయన్స్వాన్తరఙ్గే
 స ఏవ స్వయం రామచన్ద్ర: స ధన్య:   |29|

ఇతి శ్రీమత్పరమహంసపరివ్రాజకాచార్యస్య
  శ్రీగోవిన్దభగవత్పూజ్యపాదశిష్యస్య
  శ్రీమఛ్చంకరభగవత కృతౌ
శ్రీరామభుజఙ్గప్రయాతస్తోత్రం సంపూర్ణం ||

SrI gaNESabhujamgam

శ్రీ గణేశభుజంగం

- శ్రీగణేశాయ నమ: -

రణత్క్షుద్రఘణ్టానినాదాభిరామం
 చలత్తాణ్డవోద్దణ్డవత్పద్మతాలం |
లసత్తున్దిలాఙ్గోపరివ్యాళహారం
 గణాధీశమీశానసూనుం తమీడే |1|

 ధ్వనిధ్వంసవీణాలయోల్లాసివక్త్రం
   స్ఫురఛ్చుణ్డదణ్డోల్లసద్బీజపూరం |
 గళద్దర్పసౌగంధ్యలోలాలిమాలం
   గణాధీశమీశానసూనుం తమీడే |2|

 ప్రకాశజ్జపారక్తరన్తప్రసూన -
   ప్రవాలప్రభాతారుణజ్యోతిరేకం |
 ప్రలంబోదరం వక్రతుణ్డైకదంతం
   గణాధీశమీశానసూనుం తమీడే |3|

 విచిత్రస్ఫురద్రన్తమాలాకిరీటం
   కిరీటోల్లసచ్చన్ద్రరేఖావిభూషం |
 విభూషైకభూషం భవధ్వంసహేతుం
   గణాధీశమీశానసూనుం తమీడే |4|

 ఉదఞ్చద్భుజావల్లరీదృశ్యమూలో - 
  ఛ్చలద్భ్రూలతావిభ్రమభ్రాజదక్షం | 
మరుత్సున్దరీచామరై: సేవ్యమానం 
  గణాధీశమీశానసూనుం తమీడే |5| 

స్ఫురన్నిష్ఠురాలోలపిఙ్గాక్షితారం 
  కృపాకోమలోదారలీలావతారం | 
కళాబిన్దుగం గీయతే యోగివర్యై - 
  ర్గణాధీశమీశానసూనుం తమీడే |6|

 యమేకాక్షరం నిర్మలం నిర్వికల్పం
   గుణాతీతమానన్దమాకారశూన్యం |
 పరం పారమోంకారమామ్నాయగర్భం
   వదన్తి ప్రగల్భం పురాణం తమీడే |7|

 చిదానందసాన్ద్రాయ శాంతాయ తుభ్యం
   నమో విశ్వకర్త్రే చ హర్త్రేం చ తుభ్యం |
 నమోఽనంతలీలాయ కైవల్యభాసే
   నమో విశ్వబీజ ప్రసీదేశసూనో |8|

 ఇమం సుస్తవం ప్రాతరుత్థాయ భక్త్యా
   పఠేధ్యస్తు మర్త్యో లభేత్సర్వకామాన్ |
 గణేశప్రసాదేన సిద్ధ్యన్తి వాచో
   గణేశే విభౌ దుర్లభం కిం ప్రసన్నే |9|

SrI lalitA pancharatnam

శ్రీ లలితా పఞ్చరత్నం

- శ్రీగణేశాయ నమ: -

 
ప్రాత: స్మరామి లలితావదనారవిన్దం
  బిమ్మాధరం పృథులమౌక్తికశోభినాసం |
ఆకర్ణదీర్ఘనయనం మణికున్డలాఢ్యం
  మన్దస్మితం మృగమదోజ్జ్వలఫాలదేశం |1|

ప్రాతర్భజామి లలితాభుజకల్పవల్లీం
  రత్నాణ్గులీయసదణ్గులిపల్లవాఢ్యాం |
మాణిక్యహేమవలయాణ్గదశోభమానాం
  పున్డ్రేక్షుచాపకుసుమేషుసృణీర్దధానాం |2|

ప్రాతర్నమామి లలితాచరణారవిన్దం
  భక్తేష్టదాననిరతం భవసింధుపోతం |
పద్మాసనాదిసురనాయకపూజనీయం
  పద్మాన్డ్కుశధ్వజసుదర్శనలాన్ఛనాఢ్యం |3|

ప్రాత: స్తువే పరశివాం లలితాం భవానీం
  త్రైయ్యన్తవేద్యవిభవాం కరుణానవద్యాం |
విశ్వస్య సృష్టివిలయస్థితిహేతుభూతాం
  విద్యేశ్వరీం నిగమవాణ్గ్మనసాతిదూరాం |4|

ప్రాతర్వదామి లలితే తవపుణ్యనామ
  కామేశ్వరీతి కమలేతిమహేశ్వరీతి |
శ్రీశాంభవీతి జగతాం జననీ పరేతి
  వాగ్దేవతేతి వచసా త్రిపురేశ్వరీతి |5|

య: శ్లోకపఞ్చకమిదం లలితాంబికాయా:
  సౌభాగ్యదం సులలితం పఠతి ప్రభాతే |
తస్మై దదాతి లలితాఝటితి ప్రసన్నా
  విద్యాం శ్రియం విమలసౌఖ్యమనన్తకీర్తిం |6|

ఇతి శ్రీమద్పరమహంసపరిత్రాజకాచార్యస్య
శ్రీగోవిందభగవత్పూజ్యపాదశిష్యస్య
శ్రీమద్ఛంకరభగవత: కృతౌ
లలితాపఞ్చరత్నం సంపూర్ణం ||

SrI gaNeSapancharatnam

శ్రీగణేశపఞ్చరత్నం

- శ్రీగణేశాయ నమ: -

ముదాకరాత్తమోదకం సదావిముక్తిసాధకం
 కలాధరావతంసకం విలాసిలోకరఞ్జకం |
అనాయకైకనాయకం వినాశితేభదైత్యకం
 నతాశుభాశునాశకం నమామి తం వినాయకం || 1||

నతేతరాతిభీకరం నవోదితార్కభాస్వరం
 నమత్సురారినిర్జరం నతాధికాపదుద్ధరం |
సురేశ్వరం నిధీశ్వరం గజేశ్వరం గణేశ్వరం
 మహేశ్వరం తమాశ్రయే పరాత్పరం నిరన్తరం || 2||

సమస్తలోకశఙ్కరం నిరస్తదైత్యకుఞ్జరం
 దరేతరోదరం వరం వరేభవక్త్రమక్షరం |
కృపాకరం క్షమాకరం ముదాకరం యశస్కరం
 మనస్కరం నమస్కృతాం నమస్కరోమి భాస్వరం || 3||

అకిఞ్చనార్తిమార్జనం చిరన్తనోక్తిభాజనం
 పురారిపూర్వనందనం సురారిగర్వచర్వణం |
ప్రపఞ్చనాశభీషణం ధనఞ్జయాదిభూషణం
 కపోలదానవారణం భజే పురాణవారణం || 4||

నితాన్తకాంతదంతకాన్తిమంతకాన్తకాత్మజం
 అచిన్త్యరూపమన్తహీనమన్తరాయకృన్తనం |
హృదన్తరే నిరన్తరం వసన్తమేవ యోగినాం
 తమేకదన్తమేవ తం విచిన్తయామి సన్తతం || 5||

మహాగణేశపఞ్చరత్నమాదరేణ యోఽన్వహం
 ప్రజల్పతి ప్రభాతకే హృది స్మరన్గణేశ్వరం |
అరోగతామదోషతాం సుసాహితీం సుపుత్రతాం
 సమాహితాయురష్టభూతిమభ్యుపైతి సోఽచిరాత్ || 6||

ఇతి శ్రీశంకరభగవత: కృతౌ శ్రీగణేశపఞ్చరత్నస్తోత్రం సంపూర్ణం ||

SrI Siva mAnasa pUja

శ్రీ శివ మానస పూజ

- శ్రీగణేశాయ నమ: -

రత్నై: కల్పితమాసనం హిమజలై: స్నానం దివ్యాంబరం
నానారత్న విభూషితం మృగమదామోదాంకితం చందనం |

జాతీచంపకబిల్వపత్రరచితం పుష్పంచ ధూపంతధా దీపం
దేవదయానిధే పశుపతే హృత్కల్పితం గృహ్యతాం ||

సౌవర్ణే నవరత్న ఖణ్డరచితే పాత్రే ఘృతంపాయసం
భక్ష్యంపంచవిధం పయోదధియుతం రంభాఫలం పానకం |

శాకానామయుతం జలం రుచికరం కర్పూరఖణ్డోజ్వలం
తాంబూలం నమసా మయా విరచితం భక్త్యాప్రభో స్వీకురు ||

ఛత్రం చామరయోర్యుగం వ్యజనకం చాదర్శకం నిర్మలం
వీణాభేరిమృదంగకోహకలా గీతంచ నృత్యం తధా |

సాష్టాగం ప్రణతి: స్తుతిర్ బహువిధా హ్యేతత్సమస్తమ్మయా
సంకల్పేన సమర్పితం తవవిభో పూజాం గృహాణ ప్రభో ||

ఆత్మాత్వం గిరిజామతే సహచరా: ప్రాణా: శరీరంగృహం
పూజతే విషయోపభోగరచనా నిద్రాసమాధిస్థితి: |

సంచార: పదయో: ప్రదక్షిణవిధి: స్తోత్రాణిసర్వాగిరో
యద్యత్కర్మ కరోమి తత్తదఖిలం శంభో తవారాధనం ||


కరచరణకృతం వా కాయజం కర్మజం వా,
శ్రవణనయనజం వా మానసంవాపరాధం |
విహితమవిహితం వా సర్వమేతత్ క్షమశ్వ,
జయజయ కరుణాబ్ధే శ్రీ మహాదేవశంభో ||

SrImadbhagavadgeeta - dhyaana slokAs

శ్రీమద్భగవద్గీత - అన్వయ - విగ్రహం

ఓం శ్రీ గణేశాయ నమ:
శుక్లాంబరధరం విష్ణుం, శశివర్ణం చతుర్భుజం |
ప్రసన్న వదనం ధ్యాయేత్, సర్వ విఘ్నోప శాంతయేత్ ||
అగజానన పద్మార్కం, గజానన మహర్నిశం |
అనేకదం తం భక్తానాం, ఏక దంతం ఉపాస్మహేత్ ||

.. శ్రీ పరమాత్మనే నమ: ..
ధ్యానం -
పార్థాయ ప్రతిబోధితాం భగవతా నారాయణేన స్వయం
వ్యాసేన గ్రథితాం పురాణమునినా మధ్యేమహాభారతం |
అద్వైతామృతవర్షిణీం భగవతీం అష్టాదశాధ్యాయినీం |
అంబ త్వామనుసందధామి భగవద్గీతే భవద్వేషిణీం |1|


పార్థాయ భగవతా నారాయణేన స్వయం ప్రతిబోధితాం,
పురాణ-మునినా వ్యాసేన మహాభారతం మధ్యే గ్రథితాం,
అష్టాదశ అధ్యాయినీం, అద్వైత-అమృత-వర్షిణీం, భగవతీం, భవద్వేషిణీం
(హే) అంబ భగవద్ గీతే! (అహం)త్వాం అనుసందధామి |1|
---------------
నమోస్తు తే వ్యాస విశాలబుద్ధే ఫుల్లారవిందాయతపత్రనేత్ర |
యేన త్వయా భారతతైలపూర్ణ: ప్రజ్వాలితో ఙ్ఞానమయ: ప్రదీప: |2|

(హే) విశాల-బుద్ధే, ఫుల్ల-అరవింద-అయత-పత్ర-నేత్ర, వ్యాస! త్వయా యేన
భారత-తైల-పూర్ణ: ఙ్ఞానమయ: ప్రదీప: ప్రజ్వాలిత: తే నమ: అస్తు |2|
---------------
ప్రపన్నపారిజాతాయతోత్రవేత్రైకపాణయే |
ఙ్ఞానముద్రాయ కృష్ణాయ గీతామృతదుహే నమ: |3|

ప్రపన్న-పారిజాతాయ, తోత్ర-వేత్ర-ఏక-పాణయే,
ఙ్ఞానముద్రాయ, గీత-అమృత-దుహే, కృష్ణాయ నమ: |3|
---------------
సర్వోపనిషదో గావో దోగ్ధా గోపాల నందన: |
పార్థో వత్స: సుధీర్భోక్తా దుగ్ధం గీతామృతం మహత్ |4|

సర్వోపనిషద: గావ:(ఇవ), దోగ్ధా గోపాల-నందన:(ఇవ), పార్థ: వత్స:(ఇవ),
సుధీ: భోక్తా(ఇవ), గీత-అమృతం దుగ్ధం మహత్ |4|
---------------
వసుదేవసుతం దేవం కంసచాణూరమర్దనం |
దేవకీపరమానందం కృష్ణం వందే జగద్గురుం |5|

వసుదేవ-సుతం దేవం, కంస-చాణూర-మర్దనం,
దేవకీ-పరమ-ఆనందం, జగద్గురుం, కృష్ణం(అహం) వందే |5|
---------------
భీష్మద్రోణతటా జయద్రథజలా గాంధారనీలోత్పలా
శల్యగ్రాహవతీ కృపేణ వహనీ కర్ణేన వేలాకులా |
అశ్వత్థామవికర్ణఘోరమకరా దుర్యోధనావర్తినీ
సోత్తీర్ణా ఖలు పాండవై రణనదీ కైవర్తక: కేశవ: |6|

భీష్మ-ద్రోణ-తటా(ఇవ), జయద్రథ-జలా(ఇవ), గాంధార-నీల-ఉత్పలా(ఇవ),
శల్య-గ్రాహవతీ(ఇవ), కృపేణ వహనీ(ఇవ), కర్ణేన వేలాకులా(ఇవ),
అశ్వత్థామ-వికర్ణ-ఘోర-మకరా:(ఇవ),దుర్యోధన-అవర్తినీ(ఇవ), సా రణనదీ
పాండవై: ఉత్తీర్ణా ఖలు కేశవ: కైవర్తక: |6|
---------------
పారాశర్యవచ: సరోజమమలం గీతార్థగంధోత్కటం
నానాఖ్యానకకేసరం హరికథాసంబోధనాబోధితం |
లోకే సజ్జనషట్పదైరహరహ: పేపీయమానం ముదా
భూయాద్భారతపంకజం కలిమలప్రధ్వంసిన: శ్రేయసే |7|

పారాశర్యవచ: సరోజం, గీత-అర్థ-గంధ-ఉత్కటం, అమలం,
నానా-ఖ్యానక-కేసరం, హరి-కథా-సంబోధనా-బోధితం, భారత-పంకజం,
సజ్జన-షట్-పదై: ముదా అహరహ: పేపీయమానం, లోకే కలిమలప్రధ్వంసిన:
శ్రేయసే భూయాత్ |7|
---------------
మూకం కరోతి వాచాలం పఙ్గుం లఙ్ఘయతే గిరిం |
యత్కృపా తమహం వందే పరమానందమాధవం |8|

యత్ కృపా మూకం వాచాలం కరోతి, పఙ్గుం గిరిం లఙ్ఘయతే (చ) |
తం పరం-ఆనంద-మాధవం, అహం వందే |8|
---------------
యం బ్రహ్మా వరుణేంద్రరుద్రమరుత: స్తున్వంతి దివ్యై: స్తవై:
వేదై: సాఙ్గపదక్రమోపనిషదైర్గాయంతి యం సామగా: |
ధ్యానావస్థితతద్గతేన మనసా పశ్యంతి యం యోగినో
యస్యాంతం న విదు: సురాసురగణా దేవాయ తస్మై నమ: |9|

యం బ్రహ్మా వరుణ ఇంద్ర రుద్ర మరుత: దివ్యై: స్తవై: స్తున్వంతి,
యం సామగా: వేదై: సాఙ్గ-పద-క్రమ-ఉపనిషదై: గాయంతి,
యం యోగిన: మనసా ధ్యాన-అవస్థిత తద్-గతేన పశ్యంతి,
యస్య అంతం సుర-అసుర-గణా: న విదు:
తస్మై దేవాయ నమ: |9|
---------------
.. ఇతి ధ్యానం ..

SrI subrahmaNya bhujangam

శ్రీ సుబ్రహ్మణ్య భుజంగం

 

సదా బాలరూపాపి విఘ్నాద్రి హంత్రీ,

  మహాదంతి వక్త్రాపి పంచాస్య మాన్యా |

విధీంద్రాది మృగ్యా గణేశాభిధా మే,

  విధత్తాం శ్రియం కాపి కల్యాణమూర్తి: |1|

న జానామి శబ్దం న జానామి చార్థం,
  న జానామి పద్యం న జానామి గద్యం |
చిదేకా షఢాస్యా హృది ధ్యోతతే మే,
  ముఖాన్ని:సరన్తే గిరశ్చాపి చిత్రం |2|

మయూరాధిరూఢం మహావాక్యగూఢం,
  మనోహారిదేహం మహచ్చిత్తగేహం |
మహీదేవదేవం మహావేదభావం,
  మహాదేవబాలం భజే లోకపాలం |3|

యదా సన్నిధానం గతా మానవా మే,
  భవాంభోధిపారం గతాస్తే తదైవ |
ఇతి వ్యంజయన్సింధుతీరే య ఆస్తే,
  తమీడే పవిత్రం పరాశక్తిపుత్రం |4|

యథాబ్ధేస్తరంగా లయం యాన్తి తుఙ్గా -
  స్తథైవాపధ: సన్నిధౌ సేవతాం మే |
ఇతీవోర్మిపంక్తీన్రుణాం దర్శయంతం,
  సదా భావయే హృత్సరోజే గుహం తం |5|

గిరౌ మన్నివాసే నరా యేధిరూఢా:,
  తదా పర్వతే రాజతే తేఽధిరూఢా: |
ఇతీవ బ్రువం గంధశైలాధిరూఢ:,
  స దేవో ముదే మే సదా షణ్ముఖోఽస్తు |6|

మహాంభోధితీరే మహాపాపచోరే,
  మునీంద్రానుకూలే సుగంధాఖ్యశైలే |
గుహాయాం వసంతం స్వభాసా లసంతం,
  జనార్తిం హరంతం శ్రయామో గుహం తం |7|

లసత్స్వర్ణ గేహే నృణాం కామదోహే,
  సుమస్తోమసంఛన్నమాణిక్యమంచే |
సముద్యత్సహస్రార్కతుల్యప్రకాశం,
  సదా భావయే కార్తికేయం సురేశం |8|

రణథ్వంసకే మంజులేఽత్యంతశోణే,
  మనోహారిలావణ్యపీయూషపూర్ణే |
మన:షట్పదో మే భవక్లేశతప్త:,
  సదా మోదతాం స్కంద తే పాదపద్మే |9|

సువర్ణాభదివ్యాంబరైర్భాసమానాం,
  క్వణత్కింకిణీమేఖలాశోభమానాం |
లసద్ధేమపట్టేన విద్యోతమానాం,
  కటిం భావయే స్కంద తే దీప్యమానాం |10|

పులిందేశకన్యాఘనాభోగతుంగ -
  స్తనాలింగనాసక్తకాశ్మీరరాగం |
నమస్యామహం తారకారే తవోర:,
  స్వభక్తావనే సర్వదా సానురాగం |11|

విధౌ క్ల్రుప్తదండాన్ స్త్వలీలాధృతాండా -
  న్నిరస్తేభశుండాన్ ద్విషత్కాలదండాన్ |
హతేంద్రారిషండాన్ జ్జగత్రాణశౌండాన్,
  సదా తే ప్రచండాన్ శ్రయే బాహుదండాన్ |12|

సదా శారదా: షణ్మృగాఙ్కా యది స్యు:,
సముద్యంత ఏవ స్థితాశ్ఛేత్సమన్తాత్ |
సదా పూర్ణబింబా: కలంకైశ్చ హీనా:
   తదా త్వన్ముఖానాం బ్రువే స్కంద సామ్యం |13|

స్ఫురన్మందహాసై: సహంసాని చన్చ -
  త్కటాక్షావలీభృఙ్గసంఘోజ్జ్వలాని |
సుధాస్యందిబింబాధరాణీశసూనో,
  తవాలోకయే షణ్ముఖాంభోరుహాణి |14|

విశాలేషు కర్ణాంతధీర్ఘేష్వజస్రం,
  దయాస్యన్దిషు ద్వాదశస్వీక్షణేషు |
మయీషత్కటాక్ష: సకృత్పాతితశ్చే -
 ద్భవేత్తే దయాశీల కా నామ హాని: |15|

సుతాంగోద్భవో మేఽసి జీవేతి షధ్ఢా,
  జపన్మంత్రమీశో ముదా జిఘ్రతే యాన్ |
జగద్భారభృద్భ్యో జగన్నాథ తేభ్య:,
  కిరీటోజ్వలేభ్యో నమో మస్తకేభ్య: |16|

స్ఫురద్రత్నకేయూరహారాభిరామ -
  శ్చలత్కుండల శ్రీలసద్గండభాగ: |
కటౌ పీతవాసా: కరే చారుశక్తి:,
  పురస్థాన్మమాస్తాం పురారేస్తనూజ: |17|

ఇహాయాహి వత్సేతి హస్తాన్ ప్రసార్యా -
  హ్వయత్యాదరాచ్ఛంకరే మాతురఙ్కాత్ |
సముత్పత్య తాతం శ్రయంతం కుమారం,
  హరాశ్లిష్టగాత్రం భజే బాలమూర్తిం |18|

కుమారేశసూనో గుహ స్కంద సేనా -
  పతే శక్తిపాణే మయూరాధిరూఢ |
పులిందాత్మజాకాంత భక్తార్తిహారిన్,
  ప్రభో తారకారే సదా రక్ష మాం త్వం |19|

ప్రశాంతేంద్రియే నష్టసజ్ఞే విచేష్టే,
  కఫోద్కారివక్త్రే భయోత్కంపిగాత్రే |
ప్రయాణోన్ముఖే మయ్యనాథే తదానీం,
  ద్రుతం మే దయాలో భవాగ్రే గుహ త్వం |20|

కృతాంతస్య దూతేషు చండేషు కోపా -
  ద్దహచ్ఛింది భింధీతి మాం తర్జయత్సు |
మయూరం సమారుహ్య మా భైరితి త్వం,
  పుర: శక్తిపాణిర్మమాయాహి శీఘ్రం |21|

ప్రణమ్యాసకృత్పాదయోస్తే పతిత్వా,
  ప్రసాద్య ప్రభో ప్రార్థయేఽనేకవారం |
న వక్తుం క్షమోఽహం తదానీం కృపాబ్ధే,
  న కార్యాంతకాలే మనాగప్యుపేక్షా |22|

సహస్రాండభోక్తా త్వయా శూరనామా,
  హతస్తారక: సింహవక్త్రశ్చ దైత్య: |
మమాంతహ్రిదిస్థం మన:క్లేశమేకం,
  న హంసి ప్రభో కిం కరోమి క్వయామి |23|

అహం సర్వదా దు:ఖభారావసన్నో,
  భవాన్ దీనబంధుస్త్వదన్యం న యాచే |
భవద్భక్తిరోధం సదా క్ల్రుప్తబాధం,
  మమాధిం ద్రుతం నాశయోమాసుత త్వం |24|

అపస్మారకుష్టక్షయార్శ: ప్రమేహ -
  జ్వరోన్మాదగుల్మాదిరోగా మహాన్త: |
పిశాచాశ్చ సర్వే భవత్పత్రభూతిం,
  విలోక్య క్షణాత్తారకారే ద్రవన్తే |25|

దృశి స్కందమూర్తి: శృతౌ స్కందకీర్తి -
  ర్ముఖే మే పవిత్రం సదా తచ్చరిత్రం |
కరే తస్య కృత్యం వపుస్తస్య భృత్యం,
  గుహే సంతు లీనా మమాశేషభావా: |26|

మునీనాముతాహో నృణాం భక్తిభాజా -
  మభీష్టప్రదా: సన్తి సర్వత్ర దేవా: |
నృణామంత్యజానామపి స్వార్థదానే,
  గుహాదేవమన్యం న జానే న జానే |27|

కలత్రం సుతా బంధువర్గ: పశుర్వా,
  నరో వాథ నారి గృహే యే మదీయా: |
యజన్తో నమన్త: స్తువన్తో భవన్తం,
  స్మరంతశ్చ తే సంతు సర్వే కుమార |28|

మృగా: పక్షిణో దంశకా యే చ దుష్టా -
  స్తథా వ్యాధయో భాధకా యే మదన్గే |
భవచ్ఛక్తి తీక్ష్ణాగ్రభిన్నా: సుదూరే,
  వినశ్యంతు తే చూర్ణితక్రౌంచశైల |29|

జనిత్రీ పితా చ స్వపుత్రాపరాధం,
  సహేతే న కిం దేవసేనాధినాధ |
అహం చాతిబాలో భవాన్ లోకతాత:,
  క్షమస్వాపరాధం సమస్తం మహేశ |30|

నమ: కేకినే శక్తయే చాపి తుభ్యం,
  నమశ్ఛాగ తుభ్యం నమ: కుక్కుటాయ |
నమ: సింధవే సింధుదేశాయ తుభ్యం,
  పున: స్కందమూర్తే నమస్తే నమోఽస్తు |31|

జయానందభూమజ్జయాపారధామ -
  జ్జయామోఘకీర్తే జయానందమూర్తే |
జయానందసింధో జయాశేషబంధో,
  జయ త్వం సదా ముక్తిదానేశసూనో |32|

భుజంగాఖ్యవృత్తేన క్ల్రుప్తం స్తవం య:,
  పఠేత్భక్తియుక్తో గుహం సంప్రణమ్య |
స పుత్రాంకలత్రం ధనం ధీర్ఘమాయు -
  ర్లభేత్స్కందసాయుజ్యమంతే నర: స: |33|

ఇతి శ్రీమద్శంకరభగవత్ కృతౌ శ్రీ సుబ్రహ్మణ్య భుజంగం ||